T20 Asian Cup: India tsürtemi Pak tsür akok

Bangkok, November 29 (Agencies): India’er tetsür cricket teloki wicket 5 agi Pakistan tsürtem madak takok ngua, Twenty20 (T20) Asia Cup asayamong nung tanü, Mongolbar nü shilem agiogo.
Par mezüngbuba asaya 2 nung Bangladesh aser Thailand telok madak takok ngua asayaba sülen captain Harmanpreet Kaur-i aniba India teloki tan agi asaya tasembuba atonga akoker lir.
Pakistan teloki tanü mezüng batting süa, overs 20 nung wicket 7 tashi laoa ajak agi runs 97 yanglu aser India tsürtemi par wicket 5 tashi anünga alidang Pakistan teloki yangluba runs tatembangba over nung ajangteta takok angu.
India’er One-Day captain aser opener mongin, Mithali Raj-i runs 36 tashi yanglua kanga junga asaya saka Harmanpreet-i Fours 3 densema, balls 22 nung runs 26 tashi yanglua, tatem tashi kanga meranga asayaba ajanga par teloki tanü takok ngua liasü.
Tanü asaya nung Ekta Bisht-i runs 20 agüja, wicket 3 agiba den, off-spinner, Anuja Patil-i overs 4 nung runs 12 dang agüja, wicket 2 tashi agia, kanga junga asayba yong par India teloki takok angutsüsa jenjang bener arutsü.
India tsürtemi par taruba asaya Sri Lanka tsürtem den taruba December ita 1 nü aser tasüng, December ita 2 nü Nepal tsürtem den asayasü lemzüka lir.