NPF teloki Naga yimten tebilemtsü yakta latettsü imlar

Kohima, Nov. 29 (TYO) : India den Naga yimten tebilemtsü latettsü asoshi jembiba maparen ya yakta tatembang kati arutsü imlar, saka ano tarutsü nung kechi arudir aruaka akoktsüsa renema atatsüla, ta NPF tir Dr.Shurhozelie-sa tanü NPF senden nung jembidang metetdaktsü.
“Joko tang ya asenok ajak pei constituency nung lia inyakba mapa ka asütsüla aser talisa ano shirnoksa tanaben electioni aitsüba lir, parnok tarutsü anogotem indang bilemdanga sentong yanglutsüla ta paisa ashi.
Shibaisa NPF ticket meshia lir, parnokji balaka pei mapa agi sayutsüba mapang lir, anungji nisung shia pei constituency nung lia pei nübortem den külemi inyaktsüla ta NPF tirisa ayongzük.
Tang ya Nagaland nung NPF dak alaka tanga teloki government ka akümtsüba teimla mali, anungji NPF nung alirtem ajak tangatetba tajung nung pei nübortem den jembia mapa inyak tenzüktsüla ta Dr. Shurhozelie-isa metetdaktsü.
Joko, Manipur nungbo election yakta dang lir asünungji, tan hopta nungsa NPF ticket nung aitsü purtem tenüng metetdaktsütsü ta NPF tir Dr.Shurhozelie-isa ashi. Naga nunger lushi nung aliba constituency ajak nung candidate yoktsü aser ano iba denji Kuki nunger candidate ana tashi aliba atema pelar ta paisa metetdaktsü.