T.R Zeliang-i Naga yimten tebilemtsü atema tajungtiba imlatsü mepir; February 2017 nung municipal election agitsü

Kohima, November 29 (TYO) : Naga yimten tebilemtsü atema tang tejembidak olemtep ajanga telemtetba tajung ka agitsü ta Naga nungertemi imla atadi, ta Chief Minister T.R Zeliang-i ayongzük.
Mashilen bilema jembiba aser nüngdakba maliba olulutem ajanga asenok manisadaktsüli aser tajungtiba atema dang teimla yudi, ta pai ashi.
Mongulbarnü NPF CEC senden nung T.R Zeliang medentet aser pai züluba osang Working President Apong Pongener-i zünga metetdaktsü.
Naga yimten tebilemtsü tekaratiba nung lemtettsü atema Nagaland nung tang mezüng atema opposition maliba sorkar ka tentet. Iba telongjem ajanga tang tejembidak olemtep jenjang tajungba yangluogo aser küm ka tsüngda terenlok aika liasü. Naga yimten tebilemtsü atema terenlok anguba rongnung, yaküm August 3 nü Centre aser NSCN (IM) tsüngda Framework agreement agiba liasü, ta chief minister-isa ashi.
Sorkari tetsür tashi itdaktsütsü asoshi mapa inyaker aser iba asoshi Urban local Bodies nung tetsür nem shilem 33 lemzükba ajanga tajangzük angutsü amanger, ta paisa ashi.
Municipal election ji February 2017 tetenzüklen agitsü anungji iba atema mapa inyaktsüla. Maneni, Nagaland assembly election kobi melii agitsü aser taruba election nungjibo constituency aika nung inyakyim melenshitsüsa akümtsü aser ibaji opposition maliba sorkar tentetba ajanga asütsü, ta T.R Zeliang-isa party züngsemtem ayongzük.