Ozü government majung !

Nagaland governor P.B.Acharya-i pa aoba ajaklen Nagaland state government nung alirtemi ochimashi mapa inyakba indang kanga jashia jembiba tetezüji ozü government-i ochimashi mapa kanga inyaker, anungji nübortemi ochimashirtem dakbo kecha arendaka melii tim teinyaktsü inyaktsüla ta state nung ochimashi mapa miter Vigilance Commission aser nübortem tasü itdakja jembiba o ka lir. Teinyaktsü purtemi mapa küma meinyaktetter dang ashi governor-i shinüba o jibo ajaki kanga junga angatetter. Aji oda, pai shinübajibo Nagaland ajungtsü atema ajak tan asütsüsa ochmashi mapa tulu inyakertem minister asütsüa akok mesüra department nung tekolak purtem asütsüa akok, shirnoki ochimashi mapa inyaker, item rongnung tuluba dak kongshi nung dang tanüngertemji tan asütsü aser temulung meyiper ochishir akümtsü. Iba amaji tanga state-tem nung atalokba aiben asenoki tv nung angur aser osangkaket nung züngshir. Aji oda, governor-iang state government nung ochimashi inyakba indang yimjak nung jembiba jagi Nagaland kanga mejungi raksaa odagi ta arsangoktsür asütsü. Iba o jagi government nung alirtema melenshitsüla aser nübortemia repranga lia ochimashi nem Nagaland meyokdaktsüi ola adoktsüla. Atangji, ki anüktsü yutsü amai Naga nungertem rongnung ochimashi anema shingaia ola madokaka, ACAUT teloki mapang mapang shia ochimashi aser tashiyim mapatem anema ola adokba ajanga nübortem kanga ajangzükdagi. Aji oda, auer kanga liaka kima azüi asangba agi auertemi sadema mauyatet amato külen governor-bai yimjak nung ozü government kanga ochimashi anungji nübortemi puang ta ayimtena senzür aser ano külen ACAUT teloki aija anidaker ta asüba agi kidang aliba ajakbo auyar moutet ano auyatsü merangba mapang ka nung Nagaland lir. Aji oda, government nung alirtemi ochimashi inyaker ta governor aser ACAUT telok amai jembibaji government nung alirtemi manganüi yakanü Kohima nung NPF telok senden nung kilonser kari governor aser ACAUT telok aija jembibaji meimlaba osang kabo masü. Ajisüaka, government nung alirtemi governor tashi agi government majungba jembibaji aitsütsü melen pei tai aser tashimait bushia tang nungi danga tajungba aser ochitashiba inyaktsü mulungtet asübo ajisa tajungba süla. Government mapaji nübortem asoshi tajung aser terenlok mapa inyaktsü aser ano külen ochimashir aser ozüng raksartem merenshitsübaji lir. Anungji, kodangsa senso tajung mesüra telok tentet kari government nung ochimashi mapatem indang aitsüdir, item tebangji nembanga yutsütsü memerangi parnoki ashibaji shitak asü tai ta bushisüngdanga inyaktsübajiang tim mapa asütsü. Tanü tensa nung Nagaland government ya kanga ochishia inyakba government ka lir tabo shingaia meshitettsü. Atangji, Nagaland government nung ochimashi inyakbaji tang NPF government nung dang masü saka tamalen nungi inyaka aruba otsü lir. Ajisüaka, ochimashi mapa inyaktsü tokteper amai government tasen aru shia ochimashi tuluba inyakli, sentsü tali tsülokli aser nübortem timtatemba timtemdaktsüli taji masütsüla. Nagaland nung asüyonga government nung ochimashi mapa inyakba ya tatembang ka atongtsüla aser iba tatembangji chief ministerba-i anir yimsüsürtem aser Chief Secreatary-i anir ketdangsertem dak nungi tenzüktsüla. Aji oda, tang Nagaland ochimashi agi sünga aliba ya mali kümdakja lokti tentettem nung inyakertemi anir putu menden nung yimsüsürtem aser nütsüng nübo ajaki ochishia alitsüsa taküm tasen ka tenzüktsüla. Asenok ajak auer aser ashir, anungji aueri auer manganü masütsüla saka Tsüngrem aser nisung tsüngdang ojang auyadi ta nangzüktsüla. Asenok alimai aruba ya auyatsü aser ochimashi mapa inyaka tangar timtemdaktsütsü aser asenbo jangratema alitsü ta asütsü aruba masü saka ochishia alitsü, meranga inyaktsü aser ajak den meimtepa aser yaritepa alitsü aruba lir. Aji oda, asenok Khristan purtemi ochimashi inyakba agi tangar Hindu nungeri asenok aitsütsüsa asenok melili.