Taonung nungi Kohima nung Hornbill night carnival tenzüktsü

Kohima, November 30 (TYO): Kohima Chamber of Commerce & Industries (KCCI)-i, Kohima nung kümshia aliba Hornbill Night Carnival December 1 nungi 10 nü tashi aonung 6:00 ako nungi 9:00 ako tashi akatsü, ta sangdongogo.
Bodhbar nikongdang osangbenertem den jembidang KCCI Tir, Jabou Sekhose-i, iba carnival nükjidong ya local entrepreneurs, talisa zünger mapa mongui alir lanurtem ajungmesotsü atema lir, ta metetdaktsü.
Iba Carnival nungsa Self Help Groups, NGOs, Arogotem, college densema reju balala nungi shilem agia tanur kazütsü nungi tenzüker handlooms, handicraft den chiyungtsü balala ayoktsü.
Ano shilem agirtem aika YouthNet, Entrepreneurs Associates (EA) amalai ajungkettsüogo, ta paisa ashi.
Iba dak sentakba nung KCCI-i nüburtem dang carnival nung shilem agia asen nisungtem dang nungi shishiba ajanga parnok ajungmesodaktsüner ta mepishia metetdaktsü.
Night carnival ya Old MLA Hostel Junction nung Brihostibar nikongdang 6:00 ako nung KCCI nung taoba Tir, Khriehuzo Lohe-i lapoktsütsü aser US Ambassador to India, Richard Verma-i mezüng aonung night carnival semdangtsü.
KCCI otongdar, Dr. Seyievilie Mor-i ashiba agi, taküm night carnival atema stall 140 lemzüktsüogo.
Taküm Carnival nung Latex Manufacturing Unit, Wokha-i latex osettem- rubber band, balloon aser glove ajungkettsütsü.
Security dak sentakba nung pai, jila tiyong nung mepetmesü madoktsü atema Nagaland Taekwondo Association nungi nisung 100 shii mapa lemzüktsütsü, ta ashi.
KCCI-i ajak dang, talisa Naga yimtenren teloktem dang mepetmesü madokdaktsüner saka night carnival nung shilem junga agidaktsüner, ta mepishia metetdaktsü.
Information & Public Relations Department-i www.ipr.nagaland.gov.in ajanga Hornbill Festival 2016 live webcast asütsü.