Linük nung mezüngbuba ‘municipal waste project’ Dimapur nung yanglutsü

Dimapur, November 30 (TYO): ‘Make in India’ programme kübok mezüngbuba municipal waste project tenzükba yimtiji Dimapur lir.
Bodbarnü Dimapur nung “Integrated Solid Waste Management, Production of Bio- Fuels with Organic farming, Skill development and Waste & Drinking water management” mapatong tenzükba ajanga iba tenüng angu.
Iba mapatong ya Newwaves Bio Fuels India Private Limited ajanga inyaker aser parnoki PPP model kübok US nungi technology bener arua inyaker. Iba ajanga jana aser endokenratem kol nung menüngsatsü aser iba jagi energy melenzüktsü.
United North Block, Burma camp nung alirtemi parnok kiyong nung aliba DMC dumping ground belenang ta takhangba agüja arur saka tangbo parnok anisüngzük angutsü, kechiyong plant ji kasa tesem nung amenoktsü aser iba nung solid waste ji organic farming atema amshitsüsa melentsü. Iba mapatong ya December 15, 2016 nungi tenzüktsü sentong lir aser ita 24 tsüngda yangluzüktsü.
Iba mapatong ajanga public nem tajangzük bener arutsütsü aser ibaji skill development o environment improvement nung lir.
Bodbarnü Hotel Acacia nung Municipal Affairs Parliamentary secretary, R Tohanba-i o jembidang, Newwaves Bio- Fuel India Pvt. Ltd-i Make in India programme kübok Dimapur shimba atema pelaba metetdaktsü.
Iba mapatong ajanga Dimapur nung solid waste management dak sendakba khurettem ajak koktettsü, ta paisa ashi.
Iba mapatong inyakba nung state sorkari akokba tashi yariteptsü mulunga lir aser state renloktsü aser nübortem ajungtsü atema sorkari bendanga agüja mapa inyaker. ta R. Tohanba-isa ashi.
Sentong nung DMC CEO, Atokhe Aye-i o jembidang, state sorkari Dimapur nung technology tasen bener aruba atema tenüngsang agütsü.
Iba mapatong ajanga jana endoktsü khuret tuluka koktettsü aser ibaji ajanga alima temerükba akümtsü, ta paisa ashi.
“Iba mapa takok ngua inyaktsü atema Nagaland public temi shilem agitsüla aser pusema nungittsüla. Nagaland nung mapatong aser sentong aika nung public-i amalitep maliba ajanga tamakok ajuruba asenoki ngua lir. Anungji, iba mapa nung nisung ajaki pusema nungita yariteptsü ayongzüker,” ta Atokhe Aye-isa shisem.
Sentong nungsa Commissioner & Secretary John Menokhol-ia o tatsüka jembi aser Dr. Misra, Scientist-i mapatong inyaktsü aliba indang temetettsütem lemsatep.