Tunisia o Morocco nati amaliteptsü nangzükteper

Tunis, November 30 (Agencies): Tunisia aser Morocco linük nati tesendaktep tajungba yua, par linük ana tsüngda amalitep alitsü nangzüktepba olen ka Morocco Foreign Minister, Salaheddine Mezouar-i tanü, Bodbar nü metetdaktsüogo.
“Tunisia linüki ‘Tunisia 2020’ ta ajaba küm 5 terenlok alitsü mapatong takok ngua tenzükba atema Morocco yimli-i Tunisia lenirtem nem tenüngsang agütsür,” ta pai ashi.
Tanaben tasen küma benshitetba engery tashi densema, Tunisia linüki agiba terenelok alitsü maparen ajunga nung par Morocco linüki Tunisia linük nungita yaritsü tenangzükba olen ka Mezouar-i metetdaktsü.
Tarutsü mapang, 2020 küm tashi nung Tunisia linük ajungai küm nung terenlok noklang nung shilem 4 lidaktsütsü nükjidong nung Tunisia linüki par ‘Tunisia 2020’ mapatongji taküm, 2016 tenzükogo.