Telemtetba tajung magiteti Ukraine yimjung senden tembangogo

Minsk, November 30 (Agencies): Ukraine-i ajurushia aliba mangatettep ken o bentettsütsü nükjidong nung Belarus yimtiba, Minsk nung amenba yimjung senden nung shilem agirtemi telemtetba tajung magiteti süidaktsüogo.
Taoba 2015 küm Minsk nungsa Ukraine sorkar aser sorkar anemer na tsüngda agiba yimjung tezüngzüktep mapa küma inyakdaktsütsü nükjidong nung Germany, France, Ukraine aser Russia nungi foreign minister-temi yashi, Mongolbar nü senden mena liasü.
“Tebang agi o tajung jembiba kisüngi asangsang nung yimji yimjung tensa bener marutsütettsü,” ta yashi senden tembangba sülen Germany foreign minister, Frank-Walter Steinmeier-i sangoktsü.
Ukraine aser Russia nati tekong kanga merangba ajanga Ukraine anüdoklen Donbass nung mepetmesü agientsüsa election agia, yimtenren tebentetbaren bener marutsütsütettsüsa tia ajuruba olen ka pai metetdaktsü.
Russia foreign minister, Sergei Lavrov-ia Ukraine sorkari benokba Donbass-i OSCE tetedangertem yoktsü onük magizükba osang angazükogo.
“Tanü senden nung telemtetba tajung magiteti süidaktsüogo. Minsk tezüngzüktep tang oda anendaka lir aser mangatettep ken o bentettsüsa mera tajung magitettsüsa tia ajurua lir,” ta Lavrov-i ashi.
Ukraine sorkar aser Russia-i pusema nungitba Ukraine sorkar anemertem na tsüngda taoba küm agiba yimjung tezüngzüktep mapa küma inyakdaktsütsü nükjidong nung tan senden amentsü ya linük 4-i taküm October ayonga liasü saka tan senden nung parnoki bilemba ama telemtetba tajung magitettsüsa tia ajuruogo.
Russia-i par mitkar tashi amshia, Ukraine nungi crimea peninsula tashiyim agi 2014 küm agiba sülen Ukraine nung tensa mejungi küma, tongpang kanga sashia raraba ajanga tanü tashi nung nisung 10,000 dak tema asüba osang bushiteta lir.
Ano külen, Minsk tezüngzüktep takok ngua inyaktsü atema teinyaktsü jenti anünga aliba olen ka France foreign minister, Jean-Marc Ayrault-ia metetdakja liasü.