Myanmar ajunga tanaben sentaktepshitsü nungdaker: Suu Kyi

Singapore, November 30 (Agencies): Myanmar ajunga tanaben sentaktepshitsü nungdakba olen ka Myanmar lenila, Aung San Suu Kyi-i tanü, Bodbar nü metetdaktsüogo.
“Bendangertem ozü linük shishilembatsüsa puatsü atema ozü linük ajunga tanaben sentaktepshitsü nungdaker,” ta lai ashi saka kechi tasa amshia, par linük ajunga tanaben sentakteptshidaktsütsü iba osangbo Suu Kyi-i memetetdaktsü.
“Ozü linük tensa mejungi melidaktsünür anungji, ozü linük ajunga tanaben sentaktepshitsüji kanga tongtibang. Ozü linük ajunga sentaktepshia, yimji yimjung aliba ajanga ozü Myanmar nung terenlok alitsü,” ta tang Singapore semdanga alila, Suu Kyi-i ashi.
Suu Kyi-i anogo 3 agia semdangtsü nükjidong nung Singapore tang tonga oa lir aser lai tan Hokolbar nü lar semdangtsü sentong tembangba jakdang Singapore Ato Kilonser, Lee Hsien Loong den ajurutepa senden amentsü sentong renema lir.
“Ozü Myanmar linük nung terenlok aliba ajanga ozü nüburtemi telongjem aliba ajanga terenlok alir ta angateta akümtsü,” ta Suu Kyi-i lar linük jenjang tajungba kümdaktsünüba olen ka lemsatepa liasü.
Myanmar kübok Rakhine state nung nütsüng yongsük ajema alir Rohingya Muslim nisungtem aser nübur longsoa alir Buddhist tamangba yimsü benshirtem na tsüngda mangatettep tulu adoka, tongpanga kanga sashia raraba ajanga Myanmar-i tebilemtsü khuret tulu tang benoka lir.
Ano külen, 2015 küm tashi nung Myanmar ya Singapore linüki tongtibangsüa shishilembaba linük tarensen nung 3 buba aliba aser par linük ana tsüngda dollar sen billion 3.5 shi jenjang aketba shishilembabaren inyakba osang bushiteta lir.