Nirmala-i TR Zeliang aser Modi na ajurutep ta ashibaji tai

Dimapur, August 09 (TYO): August 09, 2015 nü osangkakettem nung Centre aser NSCN-IM tsüngda yimjung tenangzükba magidang Nagaland Chief Minister, T.R. Zeliang-i Prime Minister, Narendra Modi den ajurutep ta Union Minister, Nirmala Seetharaman-i ashiba osang adokbaji tai ta Media Cell, Chief Minister’s Office sangdong ka nung metetdaktsü.
Iba tenangzüktep magidang anogo ana jakdang Chief Minister-i Prime Minister den majurutep, ta CMO sangdong ajanga jangjashitsüogo.
Nagaland Legislative Assembly Speaker lenisüba kübok NLA Parliamentary Working Committee-i July 17, 2015 nü Prime Minister den ajurutep aser iba telok nung Chief Minister züngsem ka lir. Iba sülen August 8, 2015 nü Chief Minister den State Home Minister nati Prime Minister den ajurutep aser ibaji Centre o NSCN-IM tsüngda tenangzükba agir anogo pungu sülen liasü, ta CMO-isa metetdaktsü.
Tesüiba ita ana tsüngda Prime Minister, Union Home Minister aser Interlocutor nungertem den Naga yimten khuret atema jembitepa arur. Ano, Interlocutor R.N. Ravi-ia Nagaland semdanga Naga nunger tentet balala den Naga yimten tebilemtsü atema asüngdangyaogo, saka yimjung tenangzüktep atemabo mejembi, ta CMO sangdong nungsa shia lir.
Talisa, tenangzüktep agiba mesüra framework agreement atema nangzüktepba nung state sorkar dang asüngdangya masü. Taoba mapang nung sangdongba ama, State sorkar dang Centre aser NSCN-IM tsüngda tenangzüktep nung aliba onüktem ano memetetdaktsüi lir ta nenshia metetdaktsür. Ajisüaka, telok anapronglai Naga nungertemi aginüba ama onüktem benoka alitsü ta bilemer aser tekaratiba nung Naga nunger ajaki agizüktettsüsa telemtetba ka agitsü imlar, ta Chief Minister’s Office, Nagaland sangdong nungsa metetdaktsüogo.