India nung yangluba Xiaomi Redmi 2 Prime smartphone sayaogo

Visakhapatnam, August 10 (Agencies): Xiaomi-i nangzükba ama India nung yangluba Redmi 2 Prime, smartphone sayaogo. Iba phone ya Sri City nung aliba Foxconn tesem nung yanglu aser sen jenjang 6,999 agi angutsü.

Xiaomi Redmi 2 Prime phone tasenba ya Xiaomi meyong website, Mi.com ajanga alitettsü aser ano Amazon, Flipkart, aser Snapdeal nungia alitettsüsa lapoka lir.

Redmi 2 Prime ya tang sen 5,999 agi yoka aliba Redmi 2 phone tajungba küma yanglushiba mesüka lir. Redmi 2 phone nung 1GB RAM den 8GB memory keta lir saka Redmi 2 Prime nungbo 2GB RAM den 16GB memory keta lir. Ibaji ajanga tan sayaba phone ya mezüng adokba dang nungi balaka lir.

Iba dakji alaka iba smartphone ana ya tanga amshiyimbo timba ka kasa dang lir.

Redmi 2 Prime screen ji inch 4.7 lir koba nung IPS HD (720×1280 pixels) resolution den 312ppi pixel density keta lir.

Iba phone nung Android 4.4 KitKat operating system inokja lir aser company meyong MIUI 6 agi alepa lir. Redmi 2 Prime handset nung 4G dual-SIM amshitettsü aser ibaji ajanga 4G network sadema amshitettsü. Phone nung LTE band aliba ajanga India nungbo radio kanga junga aputsü.

Redmi 2 Prime nung aliba 64-bit 1.2GHz Qualcomm Snapdragon 410 processor (MSM8916) ya Adreno 306 GPU den lokteper inoka lir. Phone tesülen 8-megapixel aser tejaklen 2-megapixel camera keta lir. Iba phone nung microSD card amshia memory 32GB tashi ulua kümtettsü. Phone rangben nung 2200mAh battery ajanga tashi agütsür.