Shibai Jayalalithaa melentsü?

Jayalalithaa Tamil Nadu nung chief minister teinyakdak lia ajungbena asüba ajanga lai aniba AIADMK telok asoshi khuret tulu ka bener arutsüogo. Jayalalithaa-i Tamil film tem nung shilem agiba ajanga la mezüng nisungtemi meteta aküm aser kanga nüngtugu aküm. Iba sülen lai teburtemi amokbanga aliba Tamil yimtenren mapa nung tetsüng ajemok aser tayongzükba aika ajurua aruba sülen lai takokma nung state madak yimsü süogo. Küm 30 jungnüa yimtenren mapa nung inyaka arudang lai takok aser tamakok aika ajuru, ochimashi ken o tem nung la dak tai tongloktsü saka iba nung jagia lai takok angu aser Tamil Nadu nung kümsük pezüben tashi Chief Minister inyak. Ajisüaka, lai kanga dang ajungbena akümli toktsür aoba ajanga, lar AIADMK telok asoshi tebilemtsü tulu ka bentsür aruogo. Jayalalithaa-i lar telok madak tashi ititta ketdangsüa aru aser la asüba sülen shibai lai toktsüba mapaji melenzüktsü mesüra lar teloki koba tashi nung lai yutsür aoba ongdang nembangtettsü ta asüba tasüngdangbatem adokogo. Küm 25 dak tema Jayalalithaa aser DMK lennir Karunanidhi nati Tamil Nadu state nung sorkar yimsü süa aru aser tena tsüngda mangatettep tulu adoka liaka, AIADMK aser DMK na tsüngda yimten mapaji nübortem temeten asoshi mapa inyakba aser kija tushia külemba tangatetba nung inyaka arur. Tenati Tamil Nadu nung yimsü süa arudang, state nung per capita income ji India linük dang nungi noklang nung shilem 50 agi teimba yanglutetogo. Jayalalithaa-i sorkar mapa inyakba nung la tenüng tali atutsüsa mapatem aika inyaktet aser itemji jenjang tajemba nung Amma canteens lapokba, mineral water, salt aser cement tem jenjang dalangba nung ayokba aser induction stoves, laptops, milch cows, mixer grinders aser gold coins angati alembatem dena lir. India yimtenren mapa nung Jayalalithaa-i mapa tajung tenzüka inyakba ajanga temelenshi bener arutsü aser tanga state temi dang masü saka Centre sorkaria item mapa ajizüka inyaktsü tenzük. Ibaji dang masü saka laisa Tamil Nadu nung industry aser services jenjang tajungba kümdaktsü. Lai mezüng chief minister inyaktsü mapa benlokba sülen, Ford company nem Tamil Nadu state nung mapa inyaktsü temelaba agütsü aser ibaji ajanga tang India nung gari yangluba tesem tongti rongnung Tamil Nadu dena lir. Tanü India nung ‘industrialised states’ ta jaloktsürtem rongnung Tamil Nadu densemtsüsa Jayalalithaa-i mapa aika inyaktsüogo. Ajisüaka, AIADMK-i sorkar melentepa inyaka arudang parnoki junger ta bilemba dang inyakba aser ochimashi mapa inyakba ken o tem adok aser iba ajanga parnoki tetsükdaktsütem ajuru. Ochimashiba ken o nung tai tonglokja Jayalalithaa tepuokdak ayutsüsa mapang ka ajuru saka la iba ken o nungi jenbutetba ajanga la jenjang tajungba aküm. Tamil Nadu state nung nisung kati dang tashi amshitettsüsa aliba tensa ka nung Jayalalithaa ajungbena asüba ajanga lar telok asoshi khuret tulu ka bener arutsüogo aser la pusemba nübortem terata ka nung lir. Anungji, timtem tulu majurudang lar teloki kanga dang shisa kaa mapa inyaktsü mapang ka lir, aji ta mesüra la asüba ajanga DMK ajangzüktsü ana nung lir ama ajiteter.