Vilokali Zhimomi-i Miss Nagaland 2016 korang angu

Miss Nagaland 2016 Vilokali (tiyongtsü) den mezüngbuba jenjang angur Chuichang (abelen) aser tasembuba jenjang angur Shenili nungertem agiba noksa angur. (Kohima, December 8)

Kohima, December 8 (TYO) : Zunheboto district nungi arishi küm 19 tain Vilokali Zhimomi-i Brihostibar aonung Miss Nagaland 2016 takok korang nguogo.

Vilokali ya Bachelor of Arts azünger kaketshir ka lir aser la indang temang tasazükji 33-27-36 lir aser tarji feet 5.7 talang lir. Lai journalist akümtsü jangrar.

Taonung tetendangertemi Vilokali dang, ‘iba tobur ajungba tetoktepba ajanga la indang tarutsü wadang nung koma teyari angutsü’ ta asüngdangdang lai ashiba agi, ‘iba tetoktepba ajanga lai tangar den jembishinütsü aser nisungtem tsüngdang tasü itta nokdaktsü angazük aser item yimyaji journalist ka asoshi kanga nüngdak lir’.

Miss Nagaland 2016 semi-final nungsa Vilokali dang la asoshi tepela aser takok angutsü tasaji kechi ta asüngdangdang, “temulungjang ajak agi bendanga agüja mapa inyaktsüla aser taküm nung tejangraba tongteta inyaktsüla” ta lai langzüa liasü.

Taküm tetoktepba nung Tuensang district nungi arishi küm 19 tain Chuichang-i tanabuba jenjang aser küm 19 tain Shenili Chishi-i tasembuba jenjang takoktem angu.

Miss Nagaland 2015, Nenghoiling Hansing-i Vilokali Zhimomi nem takok korang semoktsü. Iba mapang Nagaland Chief Minister T.R Zeliang, Miss North East Jewel Queen 2016 aser Miss Queen East of Miss Queen of India 2016, Veineinem Singson na liasü.

Beauty and Aesthetic Society of Nagaland (BASN) tenteter küm 25 ajungba nüngtem nung Miss Nagaland tetoktepba ayongzüka agi aser iba sentong ya Hornbill benjung nung shilem ka ama lir.

Iba sentong ya Kohima district kübok Jotsoma nung aliba Regional Centre of Excellence for Music & Performing Arts nung ayongzüka agi.