S Korea Parliament-i Park Tir menden nungi anentsütsü onük agizüker

Seoul, December 09 (Agencies): South Korea parliament yimsüsürtemi par Tir, Park Geun-hye yimsüsütsü menden nungi anentsütsü onük tanü, Hokolbar nü agizükogo.
Parliament-i tan lemtetba ama, asangsang nung Tir menden toktsütsüsa kümra, Park ya maksü nung yimsüsütsü menden toktsütsüsa akümer mezüngbuba S Korea Tir akümtsü.
Park Tir menden nungi anentsütsü asoshi benokba onükji parliament yimsüsür 234 tashi miima agiba vote bendentsü sentong nung par vote agüja agizükba aser iba ajanga Park-i aniba Saenuri Party yimtenren telok nungi yimsüsür 60 dak temai par vote agüja, Park Tir menden nungi anentsütsü onük pusema nungitba osang angazükogo.
Ajisüaka, linük temzüngi melaba ama, Constitutional Court-i tan telemtetbaji agizük nung dang Park-i asangsang nung Tir mendenji toktsütsü jenjang ajurutsü aser iba mapatong tembanga agitsü atema anogo 180 shi agitsü.
“Ozü nübur aser parliament yimsüsürtemi agiba telemtetba agizüktsü renema lir. Tan telemtetba agiba ajanga asen linüki ajurushiba yimtenren makmakshimak tai agientsü imlar,” ta Park-i tanü amenba rongdak cabinet senden nung metetdaktsü.
Parliament-i la Tir menden nungi anentsütsü telemtetba agiba sülen Park melenzüka, par Ato Kilonser, Hwang Kyo-ahn-i Park’er yimsüsütsü tashi aser khuret ajunga agizüka abentsü renema lir.
“Ni temulung shiranga yimsüsütsü khuret ya benzüker. Tan amala tensa ajurushiba atema kanga sasar,” ta Hwang-ia temulung shiranga ashi.
Ano külen, parliament-i Park yimsüsütsü menden nungi anentsütsü onük agizükba osang angazükba sülen parliament ki kimalen sentepa alir nüburtem kanga dang pelatepa liasü.
Arishi küm 64 tain Park-i lar tembar, Choi Soon-sil nem rongsen tajangzük balaka agüja, ozüng alema inyakba ken o nung ajemdaker, opposition telok densema, par nüburtemi la Tir menden nungi anentsü takhangba benoka, la kanga sashia anemtsü tenzük.
Tir menden abentsü kümsük 2018 küm February ita tashi abentsü alila, Park-i Tir mendenji asangsang nung toktsütsüsüa kümra, la melenzüktsü atema Tir tasen ka anogo 60 tsüngda nung shimtsü atema linük temzüng nung latetja lir.
Park melenzüktsü election nung United Nations (UN) Secretary General, Ban Ki-moon aser 2012 election nung Park den tamakok ngua tokteper tongti opposition Democratic Party telok lenisang, Moon Jae-in nati candidate ama tokteptsü akok.