Nagaland PCCF nem Tigerland India Biodiversity Conservation Award agütsütsü

Kohima, August 10 (TYO) : Principal Chief Conservator of Forests aser Head of Forest Force, Nagaland M Lokeswara Rao, IFS nem mezüngbuba Tigerland India Biodiversity Conservation Award, 2015 agütsütsü shimogo.
Iba sempet ya August 26 nü Bhopal nung Tigerland India Film Festival (TIFF)-i agütsütsü aser iba sentong nung Bollywood actress Waheeda Rehman adentsü.
TIFF-i visual media ajanga arem shiruru kümzüka ayutsü aser meteta lidaktsütsü osang prokshir, ta Director Abhinandan Shukla-i ashi.
M Lokeswara Rao, PCCF & HoFF lenisüba kübok Nagaland Forest Department-i Amur Falcon kümzüka ayutsü atema mapa inyakbaji national aser international media ajanga pelashishia agizükogo, ta paisa ashi.
Department of Forests, Nagaland-i Pangti yimtsüng nung ketdangsertem den amalitepa arem shiruru wazüka ayutsü atema inyakba ajanga Nagaland-i “Falcon Capital of the World” ta tenüng ngutetogo, ta Abhinandan Shukla-isa metetdaktsü.
Nagaland state Forest Department-i Amur Falcon wazüka ayutsü inyakbaji tanga asoshi tatishitsü tajung ka lir ta TIFF-i agizüker.
TIFF-isa Amur Falcon nung Satellite Tagging asüba mapa atema tenüngsang agütsür. Iba mapa ya alima nung scientific community puri pelashishia agizükogo aser state department atema konang bener arutsüogo, ta TIFF Director-isa metetdaktsü.
Tigerland India Film Festival ya kümshia Society for Tigerland Conservation ajanga ayongzüka amunger.