Somalia bomb lendong nung nisung 20 dak tema asü

Somalia, December 11, 2016 : Somalia yimtiba Mogadishu nung bomb lendong atalokdang asüba tasümangtem nüburtemi bener aoba noksa nung angur.

Mogadishu, December 11 (Agencies) : Deobarnü Somalia yimtiba Mogadishu nung taküm bendanga agütsür tapoktsü pokloktsürtemi truck gari ka pokdaktsüdang nisung 20 dak tema süogo. Iba lendong ya al-Qaida den sendaktepa aliba Shabaab teloki agütsü ta tenüng agiogo, ta police-i ashi
“Tang tashi nung nguteta aliba osang agi ashiba agi iba lendong nung nisung 20 dak tema süogo aser tasür rongnung timbaka civilian tem lir,” ta Somali police commander Ibrahim Mohamed-i ashi.
Tasürtem ya iba dang nungi timba alitsü akok kechiba süra pokseter aser yirurtem ya yimti nung mozüki balalai belenshia lir aser iba bomb apokba mapang iba tesem nung nisung kwi liasüar tejangja memetet, ta paisa shisem.
Mogadishu AMIN ambulance service nung director Abdikadir Abdirahman Adem-i, kü den inyakertemi lendong nung yirur alir parnok nisung 48 tashi mozü kidangi anirogo, ta ashi.
“Bomb pokloktsür jagi iba tapoktsü tesashi ya civilian aliba tesem dak rangloker pokloktsü. Iba lendong atalokba mapang iba tesem nung ya khu belenshia aayangertem aser shishilemba mapa tilala inyakertem liasü” ta Mohamed-i ashi.
Mogadishu nung aliba nüburtemi, yimti tezülen aliba rong anenba tesemlen tapoktsü tesashi ka ola tulu adoka apokba angashiogo aser iba sülen anüngleni mokozü long tulu atuba angu, ta ashi.
Yimti nung ketdangsertem atema odongdar, Abdifatah Omar Halane-i, iba tatalokba nung bushisüdang mapare tenzüogo, ta ashi.
Shabaab teloki, iba lendong ya onoki atalokdaktsü ta tenüng agiba parnok Telegram sangdong ka ajanga metetdaktsü.
Iba sangdong nung ashiba agi, rong anenba tesem anasa aliba military tesep ka amaktsü tebilemba nung onoki iba tapoktsü pokdaktsü aser lendong nung nisung 30 shi süogo. Par telok yagi nisung asüba osang teti talila bendenloker ashir.