UP nung tzüngozüng mali, BJP-i tembangtsütsü: Modi

Bahraich, December 11 (Agencies): Deobarnü Uttar Pradesh, Bahraich nung BJP indang nüboyim sentong ka nung Ato kilonser, Narendra Modi-i mobile phone ajanga, taruba Uttar Pradesh assembly election nung BJP-i takok ngura pai state nung ozüng maliba anentsütsü, ta metetdaktsü.
Ato kilonser Modi-i phone ajanga Bahraich nung aliba nüburtem dang, “Tanü state (UP) nung tzüzüng ozüng mali. Iba yagi ajak laktetogo. Police-ia item auertem menokdangteter,” ta ashi.
State sorkar tashi nung aliba party- Samajwadi Party aija Modi-i, “Nenoki ner state tejakleni onüra, item auer pusemertem (SP) nenoki sendoktsüsa akumtsü, aser Bharatiya Janata Party (BJP)-i ibaji inyaktsü,” ta ashi.
“Centre sorkari black money anema raraba nung Samajwadi Party (SP) aser Bahujan Samaj Party (BSP)-i anemba ya ni mangateter,” ta paisa ashi.
“Onük aika nung aiben parnok (SP & BSP) tangatetba balala. Ajisüaka tawa parnoki obang ka ser jembir. Black money anema raraba nung parnoki anembaji ni mangateter,” ta Ato kilonser, Modi-isa ashi.
“Ni black money aser ochimashi anema maneni raratsü aser tarutsü nung ochimashirtem ajak aputsü. Ozü sorkar ya sensakertem atema lir,” ta pai ashi.
Nikongdang 1:00 ako nung pai jembitsü liasü, saka tzüsü aliba ajanga helicopter manentetba agi nikongdang 3:00 ako nungang pai phone ajanga senden nung jembitsüsa akum.