Rajinikanth arishi küm 66 jungaka Jaya asüba ajanga benjung mamung

Chennai, December 12 (Agencies): Tanü December 12 nü Superstar, Rajinikanth arishi küm 66 jungogo ajisüaka tawa (December 5, 2016 nü) taoba Tamil Nadu Chief Minister J Jayalalithaa asüba ajanga tasoba anogo nung benjung ayongzüka maka.
Ajisüaka Ato kilonser, Narendra Modi densema lenir aika aser celebrity aikati pa den tasoba anogo tepela salem osang lemsatepogo.
Modi-i twitter ajanga, “Tepela tasoba anogo salem@superstarrajini! Na anema arishi talang alitsü atema sarasademtsür,” ta lemsatep.
Ano Amitabh Bachchan aser Shah Rukh Khan natia tasoba anogo salem osang lemsatepogo.
Bachchan-i twitter ajanga, “December 12 nü ya Rajnikant tasoba anogo lir aser onoki pa tepela nung alitsü aser anema alitsü atema sarasademtsür,” ta shia tena külemi tangokba noksa ka lemsatep.
Ano Shah Rukh Khan-ia, Rajnikant ji Tamil megastar lir aser parnok ajak rongnung tajungtiba, ta ashi.
DMK Senyur aser Tamil Nadu Opposition Lenir, MK Stalin aser BJP state Tir, Tamilisai Sounderrajan na den acotor aikati ‘Kabali’ star, Rajnikant den tasoba anogo salem osang lemsatep.
Ajisüaka Rajnikant-i pa sapurtem dang, Jayalalithaa asüba nüngtem nung pa asoba anogonung nung benjung mamungtsü mepishi.
Yaküm küm-a Tancheepuram aser Tiruvallore districts nung tzümetsüng lendong aliba ajanga pai tasoba anogomung benjung ayonga mamong.