Iran-i Boeing nungi tayimtsü 80 alizüktsü

Tehran, December 12 (Agencies): Iran linüki dollar sen billion 16.6 shi agüja, United States (US) nung tentetba tongti tayimtsü yanglur telok, Boeing Co. nungi tayimtsü 80 tashi alizüktsü tenzüngzüktep yashi, Deobar nü agiogo.
Iran Air-i tan nübur anir senzütsü jetliner tayimtsü 80 tashi alizüktsü tezüngzüktep agibaji par linüki 1979 küm makmakshimak aser temelenshi tensa tulu ajuruba sülen tan mezüngsüa Boeing telok den tongti tezüngzüktep agir lir.
Tongpang nung amshitsü nuclear osettüset yanglua, kasaji rizüngba maparen nokdangtsü nükjidong nung alima tashi abenba linüktemi par linük anema tenokdangba sentong benoka aruba ajanga Iran linüki US küboK Chicago yimti nung tesep tentetba Boeing aser Europe nung tentetba Airbus telok densema, tongti tayimtsü yanglur teloktem den tayimtsü alizüktsü tezüngzüktep magiteti aru.
Tan tezüngzüktep agiba sülen Iran Air teloki 737 Max 8s Boeing tayimtsü 50 aser 777s tayimtsü 30 tashi alizüktsü mapa tenzüker lir.
“Boeing teloki 2018 küm nungi tenzüka, taruba küm 10 tsüngda nung Iran Air-i alizükba taymtsütemji tongtsütsü nangzüka lir,” ta Iran sorkari ketdang asüba IRNA news agency-ia osang jangjashitsü.
US sorkari Iran dang sen billion jenti aketba tayimtsü ayoktsü temeleba Boeing aser France nung tentetba Airbus yanglur telok, Toulouse na nem taküm September ita agüja liasü.
Iran-i par nuclear mapatong anentsü nangzükba melena, par linük anema benokba tenokdangba sentongtem agientsü atema alima tashi abenba linüktemi Iran den nuclear tezüngzüktep taoba 2015 küm takok ngua agi aser tezüngzüktepji agiba ajanga Iran-i tan tayimtsü alizüktsü maongkaji angur lir.
“Tan tayimtsü alizüktsü tezüngzüktep agiba ya Iran’er tayimtsü sabang atema otsütsüsüsa tongti mera agir lir. Iba tezüngzüktep mapa küma inyakba ajanga Iran nübur tajemba agi nisung 8,000 nem mapa inyaktsü lenmanga lapoktsütsü,” ta Boeing den tezüngzüktep agiba sentong nung densemsang, Iran Transport Minister, Abbas Akhoundi-ia metetdaktsü.
“Tan Boeing telok den tezüngzüktep takok ngua agiba ajanga ozü Iran linüki yimji yimjung aser terenlok asangsang nung lidaktsütsü jangraba kuli alima dang sayur,” ta pai shisem.