EU o Cuba linük nati amaliteptsü nangzükteper

Brussels, December 12 (Agencies): European Union (EU) aser Cuba linük nati amaliteptsü tezüngzüktep ka tanü, Hombar nü agiogo.
Taruba 2017 küm January ita nungi tenzüka US Tir menden abentsü alisang, Donald Trump-i US lenisütsü menden benokba ajanga EU aser Cuba na tsüngda tesendaktep mejungi mekümdaktsütsü nangzüktepa, par telok nati tan amalitepa alitsü tezüngzüktepji agi.
“Tanü anogo ya otsüsütsüsüa tongtipang anogo ka lir. Tanü tezüngzüktep takok ngua agiba ajanga EU aser Cuba nati külemi lungjemer otsü tasen zülutsü tenzüker lir,” ta Europe nung tentetba linük 28 tashi züngsemba EU tenüng nung par Foreign Policy lenila, Federica Mogherini-i metetdaktsü.
Par telok ana tsüngda amaliteptsü tezüngzüktepji Mogherini aser Cuba Foreign Minister, Bruno Rodriguez nati Belgium kübok Brussels yimti nung agia liasü.
Tan tezüngzüktep agiba sülen Cuba asetkong nung rongsenren terenlok lidaktsütsü den democracy yimsüsütsü yimya aser nübur nem agütsüba temeten kümzüka ayutsü mapatong takok ngua inyaktsü renemogo.
EU-i taoba mapang, 1996 küm nungi tenzüka Cuba linük den tesendaktep junga yua aruba osang bushiteta lir.
“Tan tezüngzüktep agiba ajanga ozü Cuba linük indang rongsenren jenjang tajungba akümtsü imlar. Ajisüaka, US-i ozü linük anema taoba mapang benokba rongsenren tenokdangba sentongtem tangasa magienba ajanga ozü linük nung rongsenren terenlok alitsüren nem tetsükdaktsü agütsür,” ta Rodriguez-ia metetdaktsü.
“EU tenteti US-i Cuba anema tenokdangba sentong benokba onük US sorkar den benoka lir aser par linüki tarutsü mapang tenokdangba sentongji agientsü imlar,” ta Mogherini-i sangoktsü.
US linüki küm 55 tejaklen nungi tenzüka Cuba linük anema tenokdangba sentong benokba sülen tanü tashi nung dollar sen billion 125.9 shi jenjang aketba tenokdangba mapatong takok ngua inyakba osang bushiteta lir.