Congress-i ochimashi inyakbatemji nüburtemi mamatoki lir: Amit Shah

Solan, December 12 (Agencies): Asen linük asoshi nükjidong tajung yutetba Ato Kilonser ka asenoki nguogo, ta Bharatiya Janata Party (BJP) Tir, Amit Shah-i demonetization maparen nung India Ato Kilonser, Narendra Modi pukuma jembiogo.
Tridev Sammelan sendong nung jembidang Shah-i taoba Ato Kilonser Dr Manmohan Singh dak temolung masüba kar ashi.
“Taoba küm ana ser tesadang nung kechi inyaktet? ta Rahul Gandhi-i asüngdangogo. Iba list nung mezüngbuba ji- o jembiteter Ato kilonser ka India nem agutsü,” ta Shah-i ashi.
Dr Singh ji Congress atema jembitsür ka dang liasü ta aija Shah-i, “Tesüiba mapang asen linük nung aliba Ato kilonser ola ji Rahul Gandhi aser Sonia Gandhi nati dang angashia liasü,” ta shisem.
Tesüiba küm 10 Congress-i aniba UPA sorkar mapang ochimashi inyakbatem BJP Tir-i metetdakja liasü.
“Sonia Gandhi aser Manmohan Singh-i India nung küm 10 yimsüsüba mapang ochimashi aser sübokrem mapa inyakba nüburtemi mamatoki lir,” ta paisa ashi.
Shah-i taruba küm Himachal Pradesh nung assembly election nung vote agutsütsüpurtem dang Himachal nung shidakba party nem vote aguja shidakba sorkar shimtsü asoshia jembia liasü.
Ato kilonser-i demonetization onük mejembinüi jenshia senzür ta opposition teloki Modi aija ashiba sülen BJP Tir-i item o jembia liasü.
Ato kilonser Modi-i, “Onoki demonetization onük nung o intepa jembitsü renema lir, saka Lok Sabha nung jembitsü atema memelaba ajanga ni lokti senden nung jembir,” ta ashi.
“Parliament senden anena lir. Yimtenren nung kanga dang takotet, India Tir-a kanga temelung animesüngzükteti lir,” ta Modi-isa shisem.
Demonetisation onük nung o enteptsü asoshi opposition teloki akhangba ajanga Parliament nung dang temendak asükwa mongpu Parliament senden junga magiteti arudar.