O tokteptsü atema sorkari melunga lir: Venkaiah Naidu

New Delhi, December 12 (Agencies): Hombarnü Union Minister, M Venkaiah Naidu-i opposition party tem dang Parliament senden katettsü atema temelaba agüjang, koba ajanga asükwa mongpu tanüngba Parliament senden junga katettsü, ta mepishiba den külemi paisa, sen tamshidak anentsüba onük densema sorkari onük ajak nung o tokteptsü melunga lir, ta metetdaktsü.
Naidu-i, “Parliament nung o tokeptsü aser o lemteptsü atema onoki melunga lir. Tanüngba anogo ana-asem nung senden junga katettsü ta onoki amanger. Sen tamshidak anentsüba onük nung dang masü saka tanga onüktem nunga o tokteptsü melunga lir,” ta ashi.
Paisa, “O lemteptsü atema meyipa arutsü asoshi ni opposition party tem dang mepishir, senden katettsü atema mela-ang aser nüburtem taginüba onüktem Parliament nung ataloktsü atema inyakang,” ta ashi.
Parliament senden December 16 nü atemtsü, aser ita ka piyong senden tembangtsü atema anogo ana-asem shi dang anünga lia Naidu-i item o jembiogo.
Eid-e-Milad-un Nabi atema tanü aser asüng na Parliament sodi lir.
Information and Broadcasting minister Naidu-isa, “Onoki ajak inyaktsü melunga lir, saka Parliament senden akatsü atema parnoki (Opposition) memelar,” ta ashi.
November 8, 2016 nü Ato kilonser, Narendra Modi-i sen 500 aser 1,000 notes anentsüba onük nung Parliament House anaprong- Lok Sabha aser Rajya Sabha naprong nung sorkar aser opposition party tem na tsüngda o langtepa yimyim ayimba ajanga senden junga mekateti arudar.
“Ni teti tajung ataloktsü ta amanger. Parliament katettsüla aser tanüngba mapangji amshitettsüla. O jembitsü atema Ato kilonser, Narendra Modi nem temelaba magütsü, ibayongji pai nüburtem assembly nung jembi,” ta Naidu-isa ashi.
Tir, Pranab Mukherjee aser BJP lenir tain, L K Advani nati jembiba o nung ajemdaker Naidu-i, “Ajaki Parliament senden junga kadaktsüner,” ta ashi.
Parliament senden junga mekatetba atema taoba Brihostibarnü Tir, Mukherjee-i, House ya longkak aittsü aser rongrong adoktsü atema tesem ka masü, ta jembia liasü.
Iba jakdang L K Advani-ia senden mekatetba atema sorkar aser opposition naprong aitsüogo, iba den külemi Speaker aser Parliamentary Affairs Minister nati senden ketdangsüa magiteter, ta paisa aija liasü.