Taküm X factor nung Matt Terry-i takok nguogo

December 12, 2016 : Taküm ‘X factor’ nung Matt Terry-i takok nguogo.
Arishi küm 23 tain, waiter, Matt Terry-i Nicole Scherzinger’s Boys’ telemsa nungi toktep aser Finland nungi kentener Saara Aalto madak takok ngua Deobar aonung temaba jenjang nung takok angu.
Iba takok anguba sülen pai Ed Sheeran-i züluba ‘When Christmas Comes Around’ ken sayatsü. Matt-i iba ken ya X Factor tatembang aonung takok angurtem tenüng metetdaktsüba sentong nung tena liasü.
Pa iba tetoktepba nung shilem agidang pa sapurtem aser ‘X Factor’ telok dang pelaba Twitter nung metetdaktsüba mapang, Matt-i, “Ni iba tetoktepba nung shilem agiba mapang ni ajurur ajak dang kangasa pelar,” ta ashi.
“Nenoki iba sentong jangratemtsü ketdaktsü aser kü taküm piyong atema mamangtetba tajangshiba tasen ka nguogo,” ta paisa ashi.
Matt-i iba sentong ketdangsertem, Dermot O’Leary aser Rylan Clarke na nema tenüngsang agütsü aser teloki mongui tongtibang mapa inyakertem nema tetushi agütsü.
Pai külemi toktepertem danga pelaba metetdaktsü, ajisüaka pa miemteper ta olulu adoker alisang Freddy Parker tenüngbo pai metetshi.
Iba tetoktepba nung Matt-i takok nguogo ta metetdaktsüba sülen tenük techira karibo Freddy-i Matt nem tenüngsang agüja tebang mesepogo ta ashi.
Freddy-a Nicole Scherzinger’s Boys’ telemsa nungi toktep saka hopta tanabuba nung out süadok. Matt-i takok anguba sülen Freddy-i, “Kü adianu nai junga inyakogo, @MattTerry93,” ta Twitter ajanga lemsatep.