Tuli nung Health Camp liasü

Dimapur, December 12 (TYO) : December 12, 2016 nü District Mental Health Programme, Mokokchung kübok Tuli Community Health Centre nung Medical Health Camp cum Disability Certification camp ka ayongzüka agiogo.
Health Camp ji Dr. Temsuyanger, DPO(UIP/RCH) Nodal Officer, District Mental Health Programme, Mokokchung aser PHC Tuli staff ajanga achaayanga agi, ta Grace Society CBR Forum, Coordinator, Chubawati-i sangdong ka nung metetdaktsü.
Tuli Town aser temeket aliba yimtsüngtem nungi temang nung timtem alir (Mental Retardation & Mental illness) nisung 19 tashi temang repranga angati mozü agütsü aser temsüa alirtem parnok nisung 12 nem Disability Certificate atema maparen renemtsü, ta paisa ashi.
Disability Certificate aser ID renemba maparen nung Grace Society CBR Forum, HQ-Changtongya ajanga acha-ayanga yaritep.
Medical officer-i tayongzükba o jembidang. yimden yimsüsür aser loktitentet lennirtemi iba ama maparen nung maongka agia pei area nung alir temang nung timtem alirtem ajungshia tsüngdong arua nungita yaritsü ajungshi.