Yimtsüngtem tia

Nagaland asoshi khuret aser tashi abener yimsüsür aser ketdangsertem anogo shia  senzüdak Kohima aser Dimapur ama nunga tenük agi ngua süiba lenmangtem meyanglutetter, light junga marur, tzübo alia ajemer, government mozü ki aser school ki asoshi sen endokba o teyari aser tajangzük anguba na meputep, government-a mali ama mashimashika aliba tia ya angudang, yimtak yimtsüngtem nung alirtembo kechi komaka tia nung alitsü ta bilemer. Iba amaji temulung animesüngzüki bilemba agi tereprangdangnü marem Nagaland angh-i Nagaland tesem ajaklen sema senzütsü meranger südi. Atangji, tatar senden alidang Kohima nung mena yur department shia nungi bendentsüba report tajung-tajung dang tatar senden nung zünger Raj Bhawan nung alitsüba kijaji governor mapa masü. Paji state maparen ajak repranga inyaktsü asoshi center sorkari yokba nisung lir. Aji oda, state government-ibo center tsüngdang tamajung aser tamakok ajak miimbanga yur tajung aser takokba osang dang ashitsüa akok saka itemji shitak asü masüar governor-i dang shitettsü. Ibaji kechi state nung südir süaka nübortem asoshi tajangzük angütsüba inyakyim ka asütsü. Ibayongji, nübortem asoshi bilemba angh-ibo pa alidak chuba kidang dang anisüngzüka melii nübortem alidak yimtsüngtem tonga oa jajar. Iba tangatetba nung tang Nagaland governor-ia akok tashi yimtsüngtem tonga oagi nübortem ajurua jajaba angur. Atangji, pa senzübaji pa kija senzür masünungji nübo aser rongsen aika endoka jajar. Ajisüaka, nübo aser rongsen meindoki governor kati nübortem majurutettsü aser parnok tia memetettsü. Aji oda, kodang state ka nung governor kari centre atema agent ka ama aser Inspector ka ama inyakdir, iba jagi state government kümdangshidaktsür aser center government-i state tia tajungba metetter. Aji oda, tawa Nagaland governori Nagaland nung tesem kar sema aodang lenmang majungba indang jashia jembiba aser school nung oagi tanurtem den midday meal külemi achiba aser yimtaklirtem dang state government ajanga inyaktsüba mapatem asüngdangba agi yimsüsürtem kar temulung animesüngzükteti bilem südi. Atangji, nübo aser rongsen endokaka governor-i dang masü saka yimsüsürtemi mapang mapang shia yimtak yimtsüng sema oa nübortem tia reprangdangtsüla aser department shia kübok tenzükertemi mapa shitak inyaker asü meinyaker ta reprangdanga jajatsüla. Idangji dang yimsüsürtemi nübortem tia tejangja nung metettsü aser tenzükertemia temulung tagütsüba agüja inyaktsü. Naga nunger yimtaklirtem asoshi tia majung kaji election mapang nung dang MLA aser minister akümtsüsang candidate ama aruba angur saka election temerbo election nung madoksanga mangur aser adoksanga marur. Nagaland nung assembly constituency teimbaka iba tia nungji lir. Iba tia nung yimtaklirtem Kohimai arur saka parnoki adokdaktsüba yimsüsür kima “No Interview” ta maloka aliba merang kishi alema mekaotetter. Iba tia nung yimtaklirtem küm pongo süir. Aji oda, joko yimtaklirtema tan asütsü mapang tongogo aser Kohima aser Dimapur nung “No Interview” ashirtem dang meyiper nübortemia “No Interview” ashitsüla. Joko, tanü putu nungbo yimsüsür aser lenirtemi anir yimtaklirtem den külemi alu tonga oagi inyaktsüba mapang tongogo. Iba amaji inyakra, governor dang masü saka prime minister dena yim tonga arudaktsünütsü. Iba amaji pei-i inyakba mapa tangar dang nümadanga sayunüa aittsüsa asenoki asen alidak terenlok mapa inyaktsüla. Tangbo asenoki senbo achir saka mapabo meinyaker ta asüba agi shinga marudaktsüner, ajisüaka iba jagi asenokang akoksatsü. Ibaji shisataka masü matumalem mapa asütsü. Iba jaklaji melenshir asenoki inyakba mapa nung asenok nümadangdanga alitsüla.