Priyanka Chopra UNICEF Global Goodwill Ambassador kümogo

United Nations, December 13 (Agencies): Actress Priyanka Chopra, United Nations International Children’s Emergency Fund (UNICEF) nung Goodwill Ambassador tasenba shimogo aser lai alima nung aliba meimchir ajunga tang obang ka sür tajemzük tia nung aliba tanurtem atema tarutsü nükla tajungba yanglutsütsü asoshi ayongzük.
UNICEF küm 70 ajungba benjungmong sentong ka yasüng amongdang Priyanka shimba osang football asayar nüngtugu David Beckham aser British nunger actress Millie Bobby Brown ajanga iba osang metetdaktsü.
“Ne tanurtem atema nüchi tia tajung lidaktsünür. Shisadangtsü asoshi nüchi, alitsü asoshi nüchi”, ta Chopra-i United Nations nung tongtipur, UNICEF Goodwill Ambassadortem aser tilatanur tem sentepa aliba sentong nung ashi.
Taküm nung kotanga mataloktangba mapatem meimchir-i inyakloka aodang, alima nung tilatanurtem azütokshi, reshikangshiba aser mashi lenmang-i anibatem nungi mekümzükteti lir, ta lai shia liasü.
“Alima ajunga nung tajemzük tia nung aliba tanurtem asoshi asenok ajak obang ka sür raraba nung nenokia shilem agitsü asoshi ni, onoki asüngdanger”, ta Priyanka-isa sangoktsü.
UNICEF-i küm aika tanurtem jenjang tajungba kümdaktsütsü asoshi meranga inyakba tenüng sanga, “…Asenoki meimchir shimdi, asenoki tang inyaktsü shimdi, asenoki asen tanur aser parnok tanur aser tarutsü putu asoshi alima tajungba yangludi”, ta lai ashi.
“Quantico” nung actress den külemi UNICEF Goodwill Ambassador Ishmael Beah, Beckham, actor Orlando Bloom aser Jackie Chan nunger densema iba UNICEF kum 70 ajungba sentong nung shilem agi.
Priyanka-i ashiba agi, la UNICEF nung joko küm 10 junga India linük nung shilem agia arudar aser anu la nem maongka tuluba agütsüba asoshi kanga ajemalua, tali bendanga agütsütsü.
“UNICEF nung küm 10 dak tali inyakba den külemi ni India nung yimtsüng aika sema jajaogo. Aser iba mapang ne tetsürchanutem aser parnok kibongtem den mapang indoka parnok tarutsü lenmangtem shisa lemsateba aruogo. UNICEF den külemi asenok ajaki bendanga agütsüshir tilatanurtem indang temeten wazüka aser kümzüka, parnok asoshi alima tajungba ka yangludi”, ta laisa shisem.