Trump lenisüba küboka Russia-US tesendaktep tajungba makümtsü: Klimkin

Kiev, December 14 (Agencies): Taruba 2017 küm January ita nungi tenzüka United States (US) Tir menden abentsü renema alisang, Donald Trump lenisüba küboka par US aser Russia na tsüngda tesendaktep tang dang nungi tajungba makümtsü ta temulung melemi bilemba olen ka Ukraine Foreign Minister, Pavlo Klimkin-i tanü, Bodbar nü metetdaktsüogo.
US sorkar tasenba nung Secretary of State menden bendaktsütsü atema Trump-i totzü shishilembar mongin, Rex Tillerson tenüng benokba osang sangoktsüba sülen Klimkin-i tan iba olenji metetdaktsür lir.
Exxon Mobil Corp lenisang, Tillerson ya Russia Tir, Vladimir Putin densema, tongti Russia lenirtem den tesendaktep tajung alir ka aliba osang jangjaogo aser Russia lenirtemia pa tenüng US Secretary of State tasenba atema benokba onük agizükba osanga angazükogo.
“US-i Ukraine aser Russia na den tarutsü anogotem nung tesendaktep junga ayutsü mesüra mayutsü atema par Secretary of State kija nem tashi agüja mali. Ajisüaka, US sorkar tasenba den tanaben sentaktepshitsü atema Russia asoshi temelaba asütsüjibo magizüker,” ta Klimkin-i ashi.
Trump-i par election nüboyimtsü sentongtem nung Russia-i 2014 küm Ukraine ket nungi Crimea peninsula tashiyim agi agiba maparen agizükba aser US-i Russia anema benokba tenokdangba sentongtem agientsü bilemba olen sangokja aliba yong Ukraine linüki tebilemtsü khuret benoktsü tenzüka lir.
US dak alaka, European Union (EU)-ia Crimea tashiyim agi agiba aser Ukraine anüdoklen alir Ukraine sorkar anemertem pusema nungitba ken o nung ajemdaker Russia anema rongsenren tenokdangba sentong benoka lir aser tenokdangba sentongji ita 6 shi talangba küma atsülangshia arur.