Russia-i Turkey den amaliteptsü renema lir: Putin

Moscow, December 17 (Agencies): Russia linüki Turkey den amalitepa, kiralongrar anema raratsü renemba olen ka Russia Tir, Vladimir Putin-i telegram ka ajanga Turkey Tir, Tayyip Erdogan den tanü, Honibar nü metetdaktsüogo.
Turkey tiyongtsülen tentetba Kayseri yimti nung Kurd nisungtemi tentetba Kurdistan Workers Party (PKK) kiralongrar teloki bomb lendong tesashi ka tanü atalokdaktsüba sülen Putin-i iba olenji metetdaktsü.
“Turkey linüki tan lendong ajuruba atema sasar,” ta shia, par linüki kiralongrar aser telungpurtem anema taoba mapang nungi tesashiba raratsü tajungshiba olen ka pai lemsatepa liasü.
Ano külen, Russia Foreign Minister, Sergei Lavrov-ia Turkey aser Iran Foreign minister-tem den telephone ajanga jembia, Syria nung tensa mejungi aliba onük benokba osang ka Russia foreign ministry-i metetdaktsüogo.
“Syria nung küm 5 shi mangatettep adoka, tongpang kanga sashia raraba ajanga tebang agi mejembitettsüsa timtem toushi ajurushia alir nüburtem nem chiyongtsü aser mozümora densema, nungdakba teyari agüja yaritsü aser yimtenren tebentetbaren bener aruja, par mangatettepbaren agientsütsü mapatong takok ngua inyaktsüsa lenmangtem bushitsü atema ozü lenir, Lavrov-i Turkey o Iran lenirtem den tanü telephone ajanga jembiogo,” ta ministry-i osang jangjashitsü.
Ministry-isa ashiba agi, Russia, Turkey aser Iran Foreign Minister-temi tarutsü anogotem nung tsüngdong ajurutepa, tanü jembiba onüktem benoka jembishitsü bangjemogo.