Nishikori-i Washington Open takok marok agizükogo

Washington, August 10 (Agencies): Japan nunger Kei Nishikori-i America nunger John Isner madak final asaya koka US Open asoshi renemshia asayba Washington Open takok marok yashi Deobar nü agizükogo.
Arishi küm 25 tain Asian No. 1, Nishikori-i yashi points 4-6, 6-4, 6-4 ngua Isner tsükdaktsü.
2014 US Open asayamong nung tanabuba jenjang angusang, Nishikori-i tan agi 10 buba ATP & WTA asayamong indang takok marok agizüker lir.
“Tan takok anguba ajanga ni hopta 3 sülen asayatsü aliba US Open asayamong nung takok ngua shilem agitetsü imlar,” ta Nishikori-ia metetdaktsü.
Nishikori-i yashi asaya nung ace 5 yanglua takok anguba sülen Washington Open asayamong asayatsü tenzüker küm 47 buba nung singles shilem indang takok marok agizüker mezüngbuba Asia asayar akümer lir.
Tetsür singles shilem nunga America tsür Sloane Stephens-i Russia tsür Anastasia Pavlyuchenkova madak takok ngua takok marok yashi agizükogo.
Stephens-i yashi points 6-1, 6-2 ngua Pavlyuchenkova madak ayong ayong takok angu.