Hockey: India tsürtemi China telok akok

Bangkok, December 17 (Agencies): Midfielder Lalremsiami-i goal 2 aser forward Sangita Kumari-i asaya tatemlen goal 1 agütsüba densema, India’er tetsür hockey asayar teloki goal 3-2 agi China telok madak taok ngua, 4 buba Women’s Under 18 (U18) Asia Cup hockey asayamong nung tanü, Honibar nü shilem agiogo.
Lalremsiami-i asaya tenzüker minute 7 buba nung 1 buba goal agüja, par India telok temaba jenjang nung ajungkettsü.
Laisa asaya mezüngbuba shilem tembangtsü minute 5 shi anünga lia 2 buba goal agüja, par India telok maneni temaba jenjang kümdaktsü.
Asaya tanabuba shilem nung China tsürtemi tajungba asayatsü tenzük aser asaya tenzüker minute 40 buba nung par asayar, Gu Yangyan-i penalty corner goal takok ngua agüja, par China telok jenjang tajungba kümdaktsü.
India asayartemia kanga meranga asaya saka asaya tenzüker minute 51 buba nung Yangan-isa 2 buba goal-a meyipja, par telok anaprongla kasa jenjang kümdaktsü.
Ajisüaka, Kumari-i asaya tatemlen 3 buba aser takokba goal agüja, par India telok nem tanü asaya kokdaktsü.