Ni ken ajak kanga shitakbo matener: Kelly Clarkson

December 18, 2016 : ‘Because of You’ ken kanga nüngtugusüa tentetla Kelly Clarkson ya classical ken tena intet aser lai item ken kangasa junga tentet, ajisüaka lai la kentem nung ken tetetzü den putepa temulungjang nungi adentsüla ta tanga bilema arur.
Lai, “Ni kanga melenshiogo. Ni classical ken tena intet aser item kenji tai tilakata melii atentsüla. Tetoktepba ajak nung teti aibelen melii adentsüji kanga tongtibang. Anungji ni mezüng ken atentsü tenzükba mapang küsasa ni kanga belema liasü. Aji oda süaka Australia nung sentong ka nung shilem agiba sülen ni sabang tesülen lua ni ken atenba agi temulung masü lia kü manager-i nai kangasa junga tentetogo! Ken ajak nung teti note ajak shitak atentsü merangba yimya intokang. Ken kanga junga atentsü atema teti note ajak shitak atentsü tenüngdaktsü mali! ta ashi. Iba mapang nungi ni iba yimya intoktsü merang,” ta ashi.
“Ni ken aten shia note ajak atentsü memeranger, ajisüaka ni pelar. Ken tetetzüi ashiba ama temulungjang nungi adoka atenba tajungba. Kodang ken ajak kangasa shitak adentsü meranger indangji keni ashiba ama masü saka robot amai akümer,” ta lai shisem.
Arishi küm 34 tain, Kelly-i lar tanurtemi tebu nüngdakba ken ‘Piece By Piece’ zülua aliba temai adoka ashi.
Ni iba ken ya kü aianu den mapang talangka sensak semer külen zülu. Tetsür aikati tebu mesükba tebur den medemer. Nibo yamaji mesüner! Ni pa junga memetet saka pai ni kü kija yutsür senzütsü nung mongin ta metet. Iba ken ya tebur iba amala jagi temulung yirutsüba indang lir, ta la Radio.com dang ashi.
“Ni mashisa maküm tashi ni iba tebilemtsü mejangjai liasü. Asenok ajak tetsü ka den timba inteter anungji tebu junga memeteter. Asenoki aji yimya ka amai agir. Nisung kati tsürabur anaprong nüngdaker anungji ni ozü tanur asoshi mapang magütsütettsübaji tebilema mebilemer,” ta Kelly-i ashi.