Jayalalithaa asüba kuli CBI nem bushidaktsütsü SC dang mepishir

New Delhi/Chennai, December 18 (Agencies): AIADMK lenir, Sasikala Pushpa-i Supreme Court dang taoba Tamil Nadu Chief Minister, Jayalalithaa asüba kuli CBI nem bushidaktsütsü mesüra Supreme Court obendanger kati judicial bushisüngdangtsü atema mepishiogo.
Temepishiba shidi nung MP nungi anendakja aliba Sasikala-i, “Jayalalithaa asübaji melung malemtsüsa lir aser la temang tia indang memetetdaktsü, la semdangtsü shinga nem-a temelaba magütsü, la asüpila sentong nung tangokba noksatem nung ’embalming’ tarak lir aser la hospital nung amongba mapang nungi la asüba mapang tashi miimshia ayu,” ta shia lir.
Laisa Centre sorkar, Tamil Nadu sorkar aser Apollo Hospital ketdangsertem dang la indang health report aser treatment agiba osang tejangja envelope ka nung Supreme Court nem agüjang, ta ashi.
Anogo ishika tejaklena Tamil Nadu Telugu Yuva Sakthi-i Supreme Court dang temepishiba ka nung, AIADMK tongti, Jayalalithaa asüba aser la indang medical report ji mongintem nem reprangshidaktsütsü atema mepishia liasü.
Ano külen Chennai nungi osang ka ajanga, asüng Tamil Nadu Chief Minister, O Paneerselvam-i New Delhi nung Ato kilonser, Narendra Modi ajurua tawa yipru mopung ‘Vardah’ agi state nung teraksatsüba osang agütsütsü, ta metetdaktsü.
Paneerselvam-isa shidi ka ajanga Centre sorkar dang, taoba Chief Minister, J Jayalalithaa nem Bharat Ratna award agütsütsü aser Parliament kima la indang kürakyanglu ka yanglutsü atema mepishiogo, ta sangdong ka ajanga ashi.
Jayalalithaa asüba sülen anogo pezünübuba nung Tamil Nadu Cabinet senden ka mena AIADMK tongti, Jaya nem India nunger tematiba civilian award, ‘Bharat Ratna’ agütsütsü atema mepishitsü lemteta liasü.
Kasa Cabinet senden nungsa, Parliament kima Jayalalitha indang kürakyanglu ka yanglutsü atema Centre dang mepishitsü lemteta liasü.
Yipru agi state kongshiba sülen Panneerselvam-i shidi ka ajanga Modi dang National Disaster Response Fund nungi state nem senotsü teyari sen crore 1,000 agütsütsü mepishia liasü.