Party nem mejangjaba tenla sen 2,000 dak tema agütsüba nokdangtsü

New Delhi, December 18 (Agencies): Sangküm küm tetenzüklen state aika nung assembly election agitsü mapang ana nung lia election mapang nung ochimashi sen amshiba nokdangtsü nükjidong nung Election Commission (EC)-i Centre sorkar dang, ozüng yanglushitsü aser mejangjaba nisungtemi yimtenren party tem nem sen 2,000 nungi tema tenla agütsüba nokdangtsü atema mepishiogo.
Ozüng yanglushitsü atema tang sorkar matsüngdang benokba nungji Election Commission-i, mejangjaba tenla sen 2,000 aser iba dang nungi tema tenla agutsüba nokdangtsü mepishia lir.
Representation of Peoples Act, 1951 Arla 29C kübok mejangjaba tenla atema ‘indirect partial ban’ lir. Yashi sorkari, yimtenren party tem dangi nija ka nungi sen 20,000 dang tajemba tenla aruba senji tashishitsü melira aser tenla agütsür maitsü tejangja agütsüra parnoki sen 500 aser sen 1,000 notes tejen pei account nung deposit asüba nungi saru magitsü, ta metetdakja liasü.
Election Commission-isa sorkar dang, Income Tax ji Lok Sabha mesüra assembly election nung toktepa takok anguba yimtenren party tem dang nungi dang magitsü benoka lir.