ACAUT-i Supply dept. mapa CBI nem bushidaktsütsü akanger

Dimapur, Dec.18 (TYO) : Tawa Dimapur nung supply department ajanga Nagaland tesem balala nung sensakertem dangi yoktsü asoshi lemzükba jang tesem ana nung bendena yur jang asepba bag melener dokan nung ayokba osang angazüka ACAUT teloki apuba mapatemji CBI nem bushisüngdaktsütsüla ta tanü Nagaland angh (governor) nem tezüluba nung takangba ka agütsüogo.
” December 9, 2016 nü PDS (supply) jang asepba bag melena seper dokan nung ayoker ta angazüka Kevijau Colony aser Lhomithi colony nung M/S/Lotha Trading Agency aser M/S. R.Z.Lotha Agency nati ayuba godown ana reprangdangi ao aser item godown-ji Tinkhu Sethi aser par Manager Nirmal Jain na meyong liasü ta jangjogo. Item godown nungji jang bag merijang aika jute bosta nung seper aruba lapoker synthetic bag temesüng nung sepya liasü. Idangjisa, FCI purtem den asüngtepdang supply jangji synthetic bag nung masü saka jute (posta) nung dang seper yoker ta metetdaktsü. Idangjisa, ACAUT purtemi anasatiba police station nem metetdaktsür godown kibur ana aser Supply department anema FIR agütsü, tesülenang item godown ajungaji nisung ka tenüng agi R.Z.Lotha-i pa tenüng nung G.Sarkar aser A.Jain na nem inyaktsü tashi agütsür liasüba jungkai adok ta ACAUT telokisa metetdaktsü.
Iba tatalokba ya linük nung mapang ka Arunachal Pradesh nung supply jangotsü mashi amshiba maparen nung taoba Chief minister Gegong Apang tepuokdaki aiba mapa dang nungi kanga agia tuluba asütsü ta ACAUT telokisa angh dangi züluba shidi nung shisema lir.
ACAUT teloki taoba ita ishika tsüngda Nagaland nung supply department ajanga kerosene aser wheat mashi amshiba indang nübortem dang jungkai adoka metetdaktsüogo. Aji oda, June 27, 2016 nü Dimapur nung gari totzü nung kerosene meyokteper ayokba mapa puteta metetdaktsü aser iba atema state government-i Special Investigation Team ka shim saka ACAUT telokibo aji magizük. Ibayongji, ACAUT teloki anir Co-Ordination Committee on Fuel Adulteration teloki longkak aitba sentong ka ayongzük aser CBI nem bushisüngdakjang ta takangba agütsü, ajisüaka state government-i itemji ajemreptsütsü merang ta ACAUT telokisa ashi. Parnokisa RTI ajanga Suppy departmenti Center nungi jangotsü agizükba aser lemtsüba osang yamai nguteta lir :
Taoba küm 12 tsüngda, Food & Civil Supply department-i kerosene litre crore 12 shi sensakertem dang nungi miimzüka yokogo, iba jagi linük nung gari totzü nung kerosene enoker ayokba nung tematiba jenjangji Nagaland asütsü. Kerosene litre crore 12 ji litre shia sen 40 asünungbo sen crore 500 adoker ta ACAUT telokisa metetdaktsü.
Ano, Naga nungertemi wheat machir saka taoba küm 12 tsüngda Nagaland asoshi wheat yokba aser supply department ajanga lemtsüba jenjangji sen crore 1,276 shi liasü aser item record-ji yamai liasü :
Nagaland nung supply department ya taoba küm talangka chief minister shiba südir pai dang bena aru, iba jagi balala ACAUT teloki CBI nem bushidaktsütsüla ta takangba agüjaka state government-i magizüker aser meyiper ACAUT purtemang nisung asem pur tepuokdak ayu, ajisüaka ACAUT purtemi puoka alirtemji bail nung chioktsü memerangdang saka nübortem meyong jangotsü crore aika miimzüka chitsüba ochimashi mapatem anema raratsüang mulungtet ta ACAUT telokisa ashi.
Iba ama Nagaland nung Naga nunger tenüng nung Tinkhu aser Nirmal Jain nungertemi supply department nung jang, kerosene, shini aser wheat nungertem amshiba mapaji CBI nem bushisüngdaktsütsüla ta ACAUT tenüng nung Co-Chairman Dr.Khekugha Muru aser züngsem Wb.Mar Longkumer nati Nagaland angh dang metetdaktsüogo.
Nagaland angh dang parnokisa kasa shidiji ato kilonser (prime minister) office tongtsütsü asoshi mepishia metetdaktsü.