Naga nungeri Dec. 25 nü Good Governance Day magizüker

Dimapur, December 18 (TYO): India sorkari December 25 nü Good Governance Day amungtsü lemtetba atema Nagaland nung arogotemi anir telok aikati ashishiteper aser parnoki sangdong balala ajanga state aser Centre sorkar dang iba telemtetba meyipa reprangshitsü atema asüngdangogo.
Iba onük nung ajemdaker tanü Nagaland Chief Minister-i sangdong ka nung ashiba agi, taküm küm tetenzüklen pa den Northeast tesem nungi chief minister temi Prime Minister dang iba telemtetba magizüker ta metetdaktsüogo.
December 25 ya küm shia alima ajungalen Yisu Khrista asoba anogomung benjung amunger aser India sorkari iba anogo nung Good Governance Day amungba ajanga Khristan tamangertem temulung yirutsür ta parnoki Prime Minister dang ashi, ta Chief Minister indang sangdong nungsa shia lir.
Good Governance ya nübortem nem Linük Temzüngi melaba temeten ka lir aser taoba India Prime Minister, Atal Behari Vajpayee tasoba anogo den repsema amungtsü lemtetaka, iba anogoji Christmas anogo lir aser official sentong mesüra benjung amungtsübaji tim masü, ta Chief Minister-isa ashi.
Chief Minister sangdong nungsa ashiba agi, tan December 12 nü pai Prime Minister dang shidi ka ajanga Nagaland nung telok aikati December 25 nü Good Governance Day amungtsü telemtetba magizükba indang metetdaktsü.
India nüjiso anguba sülen aser mangudang nungi India sorkari Christmas anogoji national holiday ka ama mungyonga arur. Anungji, India nung nübo agi tangar memenepi aliba Khristan tamangertem temulung meyirudaktsütsü atema “Good Governance Day” ji tanga anogo ka nung amungtsü akok ta pai Prime Minister dang ashi, ta Chief Minister-isa metetdaktsü.
“Anogo melentsübaji tamakoktsü süra, Nagaland State nungbo December 25 nü official function kecha ayongzüka agitsü tetuyuba magütsütsüla” ta paisa Prime Minister dang shidi ajanga metetdaktsüogo, ta Chief Minister-isa sangdong nung shia lir.
Yashi (Honibarnü) Nagaland Tribes Council (NTC), Nagaland Baptist Council of Churches (NBCC), Nagaland Senior Citizen Association (NSCA) aser Sumi Hoho teloktemi Nagaland Chief Minister, India Prime Minister, India Tir aser Nagaland Angh dangi Christmas Anogo nung Good Governance Day mamungtsüla ta tezüluba ka ajanga metetdaktsüogo.
India Linük Temzüng Arla 15 aser Arla 25 ajanga ‘freedom of religion’ temeten agütsür, ajisüaka India sorkari “Good Friday” nü Judges’ Day, “Fathers’ Day” nü Yoga Day aser “Christmas Day” nü Good Governance Day amungtsü lemtetba ya jungjunga meshisadangi inyakba mapa ka ama ajiteter. Item anogo amungba ajanga sorkari Khristan tamangertem indang tongtipang anogotem süoki ia mebilemba sayur aser Khristmas anogo nung Good Governance Day amungtsü lemtetbaji sorkari Linük Temzüng ajanga agütsüba temetentem anema inyakba lir, ta NTC Advisor, Zhovehu Lohe, NBCC General Secretary, Rev. Dr. Z. Keyho, NSCA President, Dr. S.I. Tushi, NBCC, Saniation Chairman, Kuolachalie Seyie aser Sumi Hoho President, Dr. Vinito L. Chishi nungeri sangdong nung shia lir.
India nung lennir tajung aser mezüngbuba BJP prime minister inyaksang Atal Behari Vajpayee Christmas Anogo nung asoba aser linüki pa nem pa tasoba anogo nung tenüngsang agütsübaji pelashishia agizüker. Ajisüaka, Sorkari pa tasoba anogo nung “Good Governance Day” amungtsü lemtetba ajanga Nagaland state nung aser linük nung aliba Khristan tamangertem temulung yirutsür. Iba telemtetba ajanga linük nung temulung melemtep, meputep aser telemsa adokdaktsütsü. Anungji, Khristmas anogo nung masü saka tanga anogo ka nung Good Governance Day amungtsü telemtetba agitsü mepishir, ta