Philippine lenisang, Duterte bushisüngdangtsüla: Hussein

Geneva, December 20 (Agencies): Philippines sorkari nisung tepsetba keno nung ajemdaker par Tir, Rodrigo Duterte anema bushisüngdang sentong agitsü tajungshiba olen ka United Nations (UN) Human Rights lenisang, Zeid Ra’ad Al Hussein-i tanü, Mongolbar nü metetdaktsüogo.
“Duterte-i pasasa taoba mapang nisung tepset ta yimjak nung sandongba aser pai aniba Philippine mitkar aser police ketdangsertemi ozüng alema inyaka, aibelenba kuli tejangja monguteti ozüng alema mozomora shibelener ta temulung melemi bilemertem injang agi kasetba keno nung ajemdaker bushisüngdang sentong agitsü atema Philippine sorkar ajungshir,” ta U.N. High Commissioner for Human Rights, Hussein-i sangoktsü.
Duterte-i taküm, 2016 küm June ita nungi tenzüka Tir menden benokba sülen pa lenisüba kübok par Philippine police ketdangsertemi ozüng alema mozümora shibelener aser achir ta temulung melemi bilemer nisung 6,000 dak tema injang agi kasetba osang bushiteta lir.
Ano, pai Philippine anülulentip tsütsü tentetba Davao yimti mayor inyakdang tashiyim agi nisung pua anir aor nisung 3 tashi tongpang raradang M16 rifle prangpong amshia, 1988 küm kasetba olen ka Duterte-i tawa metetdakja liasü.