Aonung bazaar

Tanü asüng Nagaland nung talisa Kohima aser Dimapur nung mapa tasen ka tenzükbaji aonung bazaar lapoka amenba ya asütsü. Atangji, tzümalenbo shishilembadak aonungang telongsoba kechiyong anüngdangbo ajak mapai aoer aser mapa nungi adoker külenang shishilembatsü tenzüker. Ano, tzümar yimsü kaji parnoki chiyongtsü anaben achitsüba dak tali alioka mayur. Iba jagi shi – ango asünunga 200 gram tashi alua alir aser aonsutsüa sen pongo mesüra ter agidang alia bener aor. Ajisüaka, parnok sobaliba den asenok kasasa masü, asenokbo anepdang mesüra anüngdangang shishilembadaki aor aser aonungbo mapa nungi arur anisüngzüker. Ibaji dang masü saka asenokibo jangotsü aser aonsutsü alidang akok tashi aika alioka ayur. Ajisüaka, tanübo asenok sobaliba teimbaka tzümartemi benshibatem dang benshir aser putu yimya aser asenok inyakba mapa agia tzümar sülen anidaktsüsa kümogo. Aji oda, tanübo asenok teimbaka anüngdang mazünger, anungji aonungang shishilembadakia otetter. Ibaji dang masü saka tangbo lanurtem aikati tachitajemtsü aser tagitarutsü aika yanglutetter, anungji itemji ayoktsü tesem aser mapang ka nüngdaker. Item ajakji asadanger, ano tang amai küm tatemlen benjongbentsü anasai arudang tesem balala nung aonung shishilembadak lapoka nisungtem longsutepa pelatepdaktsüba jagi yimti yimdong dena sangwasangwa kümdaktsür. Aji oda, joko putu tensa agi nübortemi aonungang pei kidang nungi ayazüka nisungtem longsukdak külemi dang kinunger aser medemertem den mapang endoka senzüner asünungji, anüngdang dang nungi aonung bazaar-ang tajungba aser tongtibangba kümogo. Iba nüngdakji meteta joko asenok alidak town-tem nunga government-i asüyonga mesüra private-i asüyonga aonung bazaar amendak tesem tajung mesemteta anak auyi mechii nisungtem merükmerüka aser akümketa senzütsüsa yanglutsütsü kanga nüngdak kümogo. Tangbo Kohima nung asüyonga, Dimapur nung asüyonga yimdong temesü nung anogo ishika atema refugee camp amai mica agi ki tilala yanglur anak auyi chia aonung bazaar amener. Ibaji tereprangtsüa majung aser temang asoshia majung aser meraketa senzünertemibo iba ama tesemi marutsü. Ibaji ajak asoshi takoksa lir. Item nüngdaktemji angateta yimti yimdong nung masü saka tezülen tesem tesadem tulu mekazüka yur yangji nisung aika mentettsüsa takdang aika keta yanglutsüla. Iba tesem nungji nübortem asoshi gari anendak tesem aser  metsümeshidak tajung peria alitsüla aser tang ama küm nung benjongbentsü mapang nung khen dang masü saka aonung shia teti lapoka alitsüsa chiyongdak aser kentenmenüdak peria alitsüla. Iba amajika lapoktet nungbo chiyongtsü aser osettsüset alitsü arurtem dang masü saka kidang belemseta soruchioka mekazüi aonung bazaar nung chiyongtsüsa kibong-kibong arutsü. Tanü asen lima ama nung lanurtem zünger government mapa bushir saka mangur aser peisasa mapa tenzüka inyaktsüa makoker ta aliba tensa mapang ka nung, lanurtem asoshi mapa inyakdak aser sen aadak tesem ka mesemteta yutsütsübaji kanga tongtibang lir. Aji oda, aonung bazaar nungji kentenertem, noksa yanglurtem, chiyongtsü aser oset tapu balala yanglua ayoker lanur aikati peisasa inyaktetba mapa aika tenzüktettsü. Joko, tanü putu nung yabo aonung anüngdang kecha mali, mapang (ghonda) dang repranga mapa inyaktsü.. Iba ama putu ka nung asenoka kidang dang moka mekazüi asenoka temang aser tekolok salaa khenkhenbo tangar den meyoktepa senzütsübaji nüngdaker. Aji oda, yashi tashibo asenoki aonung senzübaji seplepa senzür amai bilem saka tanü putu nungbo aonung mesüra anüngdang na kecha tebendang maka, shibai alima aser nübortem nüngdak meteta inyaker, pa mesüra lajiang tangar yaritettsüsa alitsü.  Aji oda, aonung bazaar ya anüngdang bazaar dangbo tenüngdakba asütsüsa government-i teti asoshi inyaktet asübo mapa bushirtem atema Industry tuluka lapok amai süla.