Punjab nung Congress-i mapa agütsütsü nangzüker

Chandigarh, December 22 (Agencies): Taruba küm Punjab nung assembly election agitsü lia Congress-i, temesepba mozü toktsüra mapa agütsütsü ta tezüngzüktep agitsü atema maparen tenzükba sülen tesüiba anogo ti tsüngda lanur nisung lakh 12-i tezüngzüktep agiogo.
Aam Aadmi Party (AAP) tongti, Arvind Kejriwal-i, Punjab nung par party sorkar tashii arura nisung lakh 25 nem mapa agütsütsü ta nangzükba sülen Congress-ia lanurtem dang temesepba mozü toktsüra mapa agütsütsü nangzüka liasü.
Congress-i mapa agütsütsü scheme sangdongba sülen Sangkur nung lanur nisung 1.34-i tenüng agütsüogo, Captain Amarinder Singh’er tesem Patiala nung lanur lakh 1.2, Ludhiana nung lakh 1.2, Jalandhar nung lakh 1.04 aser Bathinda nung lanur 75,626-i tenüng agütsüogo.
“Ni temesepba mozü nungi pilaa alitsü aser ozü kinüngertema piladaktsütsü nangzüker” ta Punjab nunger lanur kati tezüngzüktep agiba sülen mapa angutsü mesüra mapa mangu tashi küm asem tashi ita shia unemployment allowance sen 2500 angütsü atema ‘Berozgari Bhatta Card’ ka angutsü.
Iba maparen atema budget ji sen crore 10,000 asütsü aser Congress-i registration lakh 40 imlar.
Congress atema election sentong asameyangtsür, Prashant Kishor’er teloki iba maparen ketdangsüa inyakdar. Tang tashi nung Congress-i party ticket candidate 61 nem agütsüogo aser parnoki peipei constitueny nung iba maparen ketdangsüa inyakdar.
Ano tanüngba district tem nung züngsem 2,400-i kibok shia oa iba maparen inyakdar.