Mizoram nung Khristantemi Good Governance day mamongtsü mepeshir

Aizawl, December 22 (Agencies): Mizoram nung Khristan pur telok 14-i akümba Mizoram Kohhran Hruaitute Committee (MKHC)-i tanü state sorkar tang Christmas nung Good Governance Day mamongtsü temepeshiba agütsü.
Centre-i Good Governance Day December 25 nü amungtsü lemteta aliba anogo ya Khrista yimsü amangbapur asoshi tongtibangtiba anogo ka lir, ta iba committee sangdong ka ajanga ashi.
“Centre-i December 25 anogo ‘Good Governance Day’ sangdongba ya kanga tia maka aser iba ajanga nüburtem aika tetsükdaktsü ajurutsü aser Christmas benjung junga memongtettsü,” ta parnoki ashi.
December 25 nung ya tesüiba Prime Minister Atal Bihari Vajpayee asoba anogo asüba ajanga iba anogo ya ‘Good Governance Day’ asütsü sangdongba onoki angateter, saka Khristantem atema iba anogo ya kanga temeshi anogo lir, ta parnokisa shisem.
Good Governance Day nung official sentong ayongzüka amungba ajanga Khristmas benjung sentong jangjungtsü asüba agi tanga anogo ka nung shiemteta amungtsü asoshi sorkar tang mepeshi.
MKHC-i, Khristanpur temulung meyirutsütsüsa iba anogo Dec. 25 anogo masü saka tanga anogo ka shimteta amung nung ajungtsü, ta Ato Kilonser dangi temeshiba shidi ka züluogo.