IWFNEI-i Manipur nung tetsürtem dang yimjung yanglutsü mepir

Dimapur, December 22 (TYO) : Manipur nung tensa mejungi akümba atema Indigenous Women Forum of Northeast India (IWFNEI)-i Manipur Mother’s group aser ano Manipur nung aliba tetsürtem telok ajaki yimjung yangluba mapa inyaktsü ayongzükogo.
Tamangba reju dak kongshiba, kaketshirtem dak teka sangshiba, kiojen aser garitem raksatsüba inyakyimtemji tetsübu bener arutsütsü atema inyakba mapatem lir aser item tayang küpzükba mapa ya meinyaktsüla, ta IWFNEI-i sangdong ka nung metetdaktsü.
Iba ama tesempatep mapang ka nung Manipur state nung teloktem aser kintem tsüngda tesentaktep yanglushitsü nüngdak. Yimjung yanglutsüba mapaji tetsütem aser tetsürtemi dang. Anungji, Manipur nung tetsütem aser jalatem teka amteper yimjung atema mapa unyaktsü mepishir, ta IWFNEI President aser Advisor nati sangdong nung shia lir.