FIFA Rankings: India-i küm 6 nung tan temaba jenjang angur

Bern, December 22 (Agencies): Alima ajunga nung football asayatsüren ketdang asür, FIFA-i tesüsa tanü, Brehostibar nü sangdongba asayar telok tarensen nung India’er football teloki 135 buba jenjang anguba osang angazükogo.
India teloki temaleni jenjang 2 tashi atutsü maongka ngua, tan 135 buba jenjang abentsü temetenji angur lir.
Par teloki taoba mapang, 2009 küm 134 buba jenjang abentsü temeten anguba sülen India teloki küm 6 tsüngda nung tan tematiba jenjang ajangzüker lir.
“Ozü asayartemi takok ngua, kanga junga shilem agiba ajanga tan jenjang tajungji nguogo. Tarutsü anogotem nung tan ajangzükba den temaba jenjang angutsü atema mapatong tenzüka lir,” ta India national coach, Stephen Constantine-i metetdaktsü.
“Ni coach menden abentsü tenzükdang ozü national team temaba jenjang nung ajungkettsütsü alizüng yua liasü aser tan iba alizüngji asangsang nung ajangzükogo,” ta pai shisem.
Ano külen, AFC Asian Cup Qualifiers UAE 2017 atema asayatsüren lemzüktsütsü sentong taruba 2017 küm January ita 23 nü agitsü renema lir aser India telokia iba qualifier asayamong nung par mezüngbuba asaya taruba 2017 küm March ita 28 nü asayatsü lemzüka lir.