Najeeb Jung-i Delhi LG menden nungi sodi meshiogo

New Delhi, December 22 (Agencies): Brihostibarnü Najeeb Jung-i ajungbena Delhi Lieutenant Governor menden nungi sodi meshiogo.
Najeeb Jung-i pai mezüng meimba, shisaliok dangi meyiptsü ta shiogo, ta Lt. Governor’s office osang ajanga metetdaktsü.
Jung-i sodi meshiba shidiji India sorkar nem agütsüogo.
Jung Delhi LG inyaktsü kümsük ano küm ka ser ita pongu anünga lir. Pai iba menden ya 2013 küm July ita nung atsünga liasü.
Jung-i sodi meshiba shidi nung pai Ato kilonser, Narendra Modi aser Delhi Chief minister, Arvind Kejriwal na danga pelaba shisema lir, ta osang angazüker.
Jung-i sodi meshiba sülen BJP otongdar, RP Singh-i, “Najeeb Jung-i mapa junga inyaka liasü, pa sodi meshiba ajanga onok aoksar,” ta ashi.
Ano külen Delhi CM, Kejriwal-ia, Jung-i sodi meshiba ajanga pa aoksar ta ashiba den külemi tarutsü nung pa maparen ajak nung takok ngudakjangma ta ashi. Ano külen BJP-ibo, Najeeb Jung AAP sorkar dang jashia liasü, ta ashi.
Delhi assembly nung opposition lenir, Vijender Gupta-i, municipal wards ajema kümdaktsüba onük nung Bodhbarnü BJP nungi teshimtet telok kati LG ajurua liasü aser iba mapang nung pai Delhi sorkar dang mepelaba lemsatep, ta ashi.
Gupta-isa, “AAP sorkari mapa menutsüba ajanga yashi pa jashia liasü. Pai onok dang pa hopta ka sodi agitsü ta ashi. Delhi-i pa nübo nüngdaka liasü,” ta ashi.