Chuchuyimlang nung ‘Triennial Conference’ tenzükogo

Nagaland minister, Wb.Noklutoshi-i VEC Chuchuyimlangi adokba kaket ka sayatsudang tangokba noksa nung angur.

Chuchuyimlang, Jan 4 (TYO): “Putu melenshiba den tsüngkang medem” omen nung ajemdaker Chuchuyimlang Kaketshir Telungjem (CKT)-i ayongzükba mezüngbuba “Triennial Conference” ta sür anogo asemnü agitsüba sentong tajung ka Bodbar aonung nungi tenzüka Chuchuyimlang yimdak kadagi.
Tanü iba sentong nung National Highways, Mechanical Engg, & Election minister Wb. Nüklutoshii jembidang, yongrak tajung koba ochi shia mapa meranga inyakbatem lir, itemjibo ano tanaben lanurtemi maneni akanga alenshia bener aotsü asoshi tayongzükba ka agütsü.
Paisa iba dak sentakba nung onük kar shisemdang, tanü joko Nagaland nung zünger mapa mangur nisung meyirijang tir dak tali kümogo aser tanü putu ya tetoktepba agi süngogo, tajung rongnung tajungtiba shimba putu lir, anungji, iba ama tensa ka nung kaketshirtemi tangar menepa alitsü asoshi meranga inyaktsü nüngdaker, ta ajungshia liasü.
Yongrak tamajung koba salaa indokdaktsünüba indang ka tuteta ashidang, peisasa kecha meinyakteti tangar dak imlaa aliba, tsürabur/adianutem dak nendaka aliba, iba ya ajanga asenok tejakleni mouteter. Tekolokbo lir sürnung memerangba ajanga takok mangur, anungji, pei sasa lenmang bushia jenjang yanglutsü asoshi paisa ayongzüka liasü.
“Kin kidong arishitepba aser tenük meremba yimya yabo khenyongi asen lokti nungi rakdoka indoktsüla aser kodaser putepa alitsü ta asüba indang ang ajaki bilema jembitsüla”, ta paisa ashi. Aji oda, “tsüraburtemia pei chirnurtem dang meputepba otsütem mashitsüla aser tanurtemia itemji masüngdangtsüla”, ta paisa inyakdaktsünüba olen ka shisem.
Paisa melenshidaktsünüba o ka ashidang, sentong balala nung asenoki tongti tesemdanger aser shisalen sayurtem jaokba yimya ya parnok nungi shisatsü angazüktsü tejangraba nung jaoker asü mesüra parnok nungi rongsen angutsü teimla nung jaoker?, ta asüngdanga liasü. “Rongsen imlaa jaoker asünungbo iba tangatetbaji melenshitsüla”, ta paisa shisem.
Iba sentong nung tongti tesemdanger Nuklutoshii Village Education Committee (VEC) Chuchuyimlangi adokba kaket ka dena sayatsü.
Tongti o jembir taoba Agri Director Wb. Bendangyangeri “Putu melenshiba den tsüngkang medem” onük nung ajemdaker jembidang, iba temelenshi putu yabo, kecha mesütetba nisung ka masü, saka na perirang ano nür lima yangluba nung naia yaritettsüsa naji lenla ajak nung renemtetba nisung ka asütsüla, ta tayongzükba ka agütsü.
Iba putu yabo tangari koleni anir ilen jagi aoba nisung ka masü, saka pei sasa teinyaktsü mapa puratettsüla, atongtettsüla, yanglutettsüla. “Mapa bushir masü saka mapa yangluteter kaka asütsü merangtsüla”, ta paisa ashi. “Tangari yanglua akaba lenmang nung masü saka asen sasa asen lenmang tasen bushiteta yanglua aotsüla”, ta paisa shisem.
“Na azüngba denji ne dak kechi inyaktettsü sempet lir, aji metettsü merangtsüla; iba nungji ne mulung ajak agütsütsü nüngdaker”, ta paisa ashi. “Azü mesen tesü, züzüa teli, meranga inyakang ta jembiba putu to süitemogo joko aritaka inyakang ta asüba putu lir”, ta paisa shisem.
Na kong lidir liaka, kechi inyakdir inyakaka, naji balaka ta sütettsübaji, nai mapang shitak lemsar amshitetba ajanga dang sütettsü, anungji, takoker ka akümtsü asoshi mapang tamshi shia amshitsü asoshi paisa ajungshia liasü.
Paisa tanü putu den tsüngkang medemtsüba atema kechisarena nung tasen puratetba, kasa mapang nung mapa ka dak tali inyaktettsü nüngdakba indang, temulung ulua inyaktsüba tongtibang kar, tapu aika den jungjunga metettsüba nüngdakba, angazükjen angazüka alitsüba indang, nisung teimba den metetteptsü nüngdakba, tangatetba nüngdakbatem indang tagitsü onük aika lemsatep.
Anogo asemnü agitsüba sentong nungji onük tapu balala nung ajemdaker shisatokden sentongtem akatsü. Onük shia shisalen sayurtemji takutet aser mongin nisungtem dang jaoka lir. Jangratemtsü kaji; sobaliba saya ta sür sentong balaka agitsüba lir.