Prof. Kamei alima nungi pilaogo

Guwahati/Kohima, January 05 (Agencies): North Eastern Council, Ministry of DoNER züngsem, Professor Gangmumei Kamei tanü, January 5 nü Imphal, Manipur nung süogo; pa arishi küm 77 liasü.
Professor Kamei ya 1939 küm October 21 nü Imphal nung aso. Pa ya putiotsü meteter, kaketzülur ka aser Manipur University nung History Professor liasü aser pai Northeast India aser Manipur putiotsü junga meteta liasü.
1986 küm Kohima session, Northeast India History Association (NEIHA) nung pa Tir inyaka liasü aser Manipur History Society nunga Tir liasü. Pai research kaket aika züluogo.
Pai adokba kaket rongnung ‘A history of Modern Manipur (1826-2000)’, ‘A history of Manipur: pre-colonial period’, ‘On History and Historiography of Manipur’, ‘History of Zeliangrong Nagas: From Makhel to Rani Gaidinliu’, ‘Ethnicity and Social change (An anthology of essays)’ aser ‘Lectures on History of Manipur’ nunger lir.
Putiotsü aser tribe sobaliba atema junga inyakba asoshi 2010 küm Manipuri Sahitya Parishad-i pa nem Platinum Jubilee Samman award agüja liasü. Indian Institute of Advanced Study, Shimla)-ia pa nem National Fellowship award agutsü.
Asür Prof. Kamei atema mangyimba sentong ka tanü NEC Secretariat, Shillong nung agiogo.

Nagaland CM-i asüko osang lemsatep
Tanü nikongdang Kamei asüba osang angashia aoksar, ta Nagaland Chief Minister, T R Zeliang-i metetdaktsü.
CM, TR Zeliang-i Kamei kinüngtsü, Lanshailu Kamei dang shidi ka ajanga, “Naga nunger aser ozü kibong züngsemtem tenüng nung asüko mangyim na aser ner kibong den lemsateper, aser ajak Takosang Tsüngremi iba ama mangyim mapang ka nung nü nem tesünep agujang ta sarasademtsür,” ta shia lir.