Tzüyim nug tzü tali atur, tesüiba küm 15,000 ama ataloktsü akok

London, January 06 (Agencies) : Global warming ajanga Antarctica tesem meketa aliba tzüyim nung tzü tali (sea level) atur aser ibaji ajanga küm 15,000 shi tejakdang atalokba ama ataloktsü akok, ta bushisüngdang ka ajanga ngutetba metetdaktsüogo.
“Tang iba temelenshi adokba ya tesüiba küm 14,700 nung atalokba mesüka alitsü,” ta Germany nung University of Bonn nungi bushisüngdanger rongnung ka, Michael Weber-i ashi.
Iba mapang nung tzüyim yimya melenshi aser ibaji ajanga tema nung tzü agi rür akümbatem tzü tema nung pongdaka liasü saka iba telunglen aliba tapujibo (layers) talem liasü. Iba ama tensa ka nung rür long tulutem kanga kara yimsaa aoer.
Antarctica tesemlen tang-a iba kasaji ataloker, ta Scientific Reports kaket nung adokja aliba osang nung shia lir.
“Anungji global warming ajanga iba ama rür tapu talem akümba ajanga Antarctica nung teti meyimsai aliba rür longtem yimsaa aoer aser itemji tzü temerük kümer tzüyim nung lua yimoka tzüyim nung tzü tali kümdaktsür,” ta Sydney nung Climate Change Research Center nungi Chris Fogwill-i rsaa ashi.
“Kodang tzü tema kanga mokonga kümdir indangji tzüyim telung talem akümer aser ibaji ajanga Amundsen Sea Embayment (West Antarctic ice sheet) nung kanga anüanüa yima aliba rür longtem (glaciers) kanga kara kümdaktsür,” ta Fogwill-i ashi.
Rür long timtiba yimsabaji küm 14,700 tejakdang yimsaa liasü aser iba mapang tzüyim nung tzü metre 3 agi tali kümdaktsü, ta Weber-i ashi.