India-Myanmar na tsüngda atsü atsüba mapa nokdanger

Dimapur, Jan. 06 (TYO) : India o Myanmar na tsüngda Pangsha yim anasa arrtsü nung atsü atsüdangtsü tenzükba ama anema Nagaland anüdoklen aliba kin trok Chang, Khiamniungan, Konyak, Phom, Sangtam aser Yimchunger kin telongjem Eastern Naga Peoples’ Organization (ENPO) telok senden ka December 29 nü Pangsha nung mena telemtetba ka agiogo aser iba telemtetba ajanga telok shinga parnok (ENPO) dang nungi temelaba magi artsü ajanga mesenzütsüla ta ozüng ka agütsüogo.
India aser Myanmar na tsüngda artsülen Naga nungertem pei lushi nung mesenzütettsüsa atsü matsüngdangtsüla ta tawa Khiamniungan Tribal Council-i December 12, 2016 nü India ato kilonser nem agüja aliba onükji ENPO-i repranga inyaktsü ta parnokisa lemtet.
Iba kasa onük nung Nagaland Chief minister aser Chief Secretary na pronglai ato kilonser dang Myanmar den jembitsü asoshi mepishia metetdakja lir.
ENPO lenirtemisa Pangsha anasa artsülen India o Myanmar nati atsü atsüdangtsü tenzüka aliba tesem tashiji oa reprangdanga liasü. Iba mapang, artsülen arlong 145 nungi 146 tashi nung tayimtsü anendak yanglua aliba dena raksaa aliba ngua taitsüba osang ka metetdaktsüogo.
Kasa tebilemtsü onük nung Naga nunger linük tenzüker telok balala GPRN/NSCN, NSCN (R), NNC, NNC/GDRN aser NNC/ NPGN teloktemi akümba Working Group-ia India o Myanmar na tsüngda Naga nunger lushi nung artsü yoka atsü atsüdangtsübaji kenyongi memelatsüla ta metetdaktsüogo.