Municipal elections atema Congress-i kin teloktem telemtetba atar ; Anogo trokbuba nung nisung 170-i tenüng agütsüogo

Kohima, January 6 (TYO) : Congress teloki Nagaland nung February 1 nü urban local bodies (ULBs) election nung tokteptsü atema renema lir, saka Naga nunger kin telok balalai election anema nokdakba atema parnoki mapa kecha meinyaki atar.
Tenüng agütsüba anogo tembangtsü joko anogo ka dang lia, tanü candidate 170-i tenüng agütsüogo. Parnok rongnung NPF nungi 101, BJP nungi 21 aser Independent 48 lir. Hokolbar tashi nung urban local bodies (ULBs) election atema tenüng agütsüba candidate ajak agi parnok 326 jungogo.
“Nagaland nung Municipal Councils 3 aser Town Councils 29 kübok wards 353 lir aser item asoshi February 1 nü election agitsü sentong lir. Ajisüaka, Congress Party-i ward ka nungdanga tenüng magütsü lir,” ta Nagaland Pradesh Congress Committee President, K Therie-i osangbener dang ashi.
“Kin teloktemi ULBs indang election magidaktsütsü ta lemtetba nungi masetshii nokdaktsü asü mesüra parnoki NPF nem ayongayonga takok ngudaktsütsü atema iba mapa inyaker’ar onoki shisadanga repranger” ta Therie-isa ashi.
“Onok tashimait lir saka ozü candidate temia municipal aser town councils kübok ward kar nung toktepnür. Anungji, onoki December 27 nü Congress manifesto sayaogo saka kin telok balalai magizükba atema onoki ibaji sota lir” ta paisa shisem.
“Asüngnep tashi onoki atatsü aser ajungtsü süra, tangari candidate yoka aliba ward tem nung onokia tenüng agütsütsü” ta Therie-isa ashi.
Osang kar ajanga angazükba agi, tanü Kohima nung Naga People’s Front (NPF) president, Dr Shurhozelie Liezietsu-i Angami Public Organisation (APO) dang municipal election magidaktsütsü lemteta aliba meyipa agitsü mepishia shidi ka zülu.
Ajisüaka, APO-i parnok telemtetba nungi masetshii nokdaker ta telangzüba agütsü, ta osang ajangasa ashi.