Vodafone SuperHour scheme: 3G aser 4G data ghonda ka atema sen 16 agi angutsü

New Delhi, January 6 (Agencies): Telecom operator Vodafone-i Hokolbarnü SuperHour ta ser sentong ka tenzükba osang sangdongogo.
Iba sentong kübok Vodafone pre-paid amshirtem asoshi 3G mesüra 4G data ghonda ka asoshi tanen makai amshitettsü asoshi sen 16 agi tenzüker agütsütsü. Iba den külemi ghonda ka asoshi Vodafone amshirtem tsüngda tanen makai o jembitetba pack sen 7 yong agütsütsü.
“SuperHour sentong nung nenoki jenjang temela agi iba pack alia, ghonda ka tsüngda nung data kwi download süner sütettsü. Ajidang masü, nenoki anogo nung ghonda ajak SupeHour kümdaktsütet, kechiyong iba pack maneni alitsü asoshi kecha tenokdangba mali,” ta Sandeep Kataria, Chief Commercial Officer, Vodafone India-i olen ka shisem.
“Talirtemi sen 7 agi, SuperHour pack nung densema aliba, tanen makai Vodafone amshir tsüngda o jembitetba pack alia amshitettsü,” ta paisa shisem.
Iba sentong ya January 7 nü sayatsü, aser January 9 nungi talirtem ket tongtsütsü. Tesem balala nung jenjang balala asütsü akok, ta Sandeep Kataria-isa metetdaktsü.
Iba sentong ya Bihar-Jharkhand, Madhya Pradesh-Chhattisgarh, Punjab, Himachal Pradesh – Jammu and Kashmir, aser Andhra Pradesh-Telangana tesemtem nung mali.
Iba sentong kübok 2G amshirtem asoshi-a sen 5 agi iba pack angutsü.
Maneni Vodafon play ajanga, vedeio aser movie tem tanen makai reprangtettsü. Vodafone play ya angati subscribe asütsü asoshi March 31, 2017 tashi maongka agütsütsü.