J&K yimjung ajanga India-Pak tesempatep anentsü: Mehbooba

Srinagar, January 08 (Agencies): Jammu & Kashmir nung taoba Chief Minister, Mufti Mohammad Sayeed sür tanü küm ka ajungba bilemtetba anogomung nung Mufti’er jala aser Chief Minister teinyakdak, Mehbooba Mufti-i, state nung yimjung lira ibaji ajanga India aser Pakistan tsüngda tesempatep anentsü, ta ashi.
PDP tongti, Mehbooba-i, “Yimjung maparenji state nung tenzüktsüla aser asenok tsüngda tama jembitsüla, kechiyong asen nüburtem asenok tsüngda rarateper,” ta ashi.
“Longjema alitsü atema ni nenok ajungshir. India aser Pakistan tesnetakatep mejungi lir saka ibaji teti atema asütsü makok,” ta lai ashi.
“Linük anaprong külemi alitsüla aser külemi asütsüla. India aser Pakistan na longjemtsü atema asenoki Jammu and Kashmir tesünep atema inyaktsüla,” ta lai ashi.
La tebu aser taoba chief minister, Syed asüba anogo bilemteta amungba sentong nung PDP nung inyakertem den jembidang lai iba o jembi.
Mehbooba-i ashiba agi, Pakistan aser India na tsüngchitepba ajanga Jammu and Kashmir kanga takoksa angur. “Ibaji ajanga yangi tensa kongshir, saka iba (tsükchitep) ya teti atema masü,” ta lai ashi.
Chief Minister-isa, “Sayeed-i teti state ya iba timtem nungi adokdaktsünü, kechiyong asenoki iba nungi mejenbu tashi terenlok alitsüji tamakoktsü,” ta ashi.
“Ibaji ajanga pai terenlok aser yimtenren inyakyim liromedema inyaknüa liasü,” ta shia lai, ibayongji pai par party-i iba sentong nung anidaka inyaktsü merang, aser ibaji BJP den loktepba onük nunga densema lir, ta metetdaktsü.
“Ni amanger, asenoki iba onük atema inyaktsü aser Jammu & Kashmir iba timtem nungi anitettsü,” ta laisa ashi.
Tzü, light aser ration atema teinyaktsü lir saka tongtibangtibaji mapa manguba tebilemtsü atema inyaktsü, ta lai ashi.
“Sayeed-i pa mezüng (CM) inyakba kümsük (2002-05) nung iba asoshi inyak. Lenmang lapok aser India o Pakistan tsüngda tesünep liasü, ceasefire liasü,” ta lai ashi.
“Ajisüaka yangi aser Delhi nung sorkar ajanga iba maparen tejakleni bener moutet,” ta lai tesasaba olen ka shisem.
Mehbooba-i ashiba agi, tang lar sorkari iba atemaji inyakdar aser mapang agiaka takok angutsü imlar.