Matamabensar dak azükba kuli bushiang: Suresh Prabhu

Bhubaneswar, January 08 (Agencies): Balasore railway station, Odisha nung Railway Protection Force (RPF)-i matamabensar ka dak taochi makai azükba asoshi kuli tejangja bushitsü asoshi, Railway Minister Suresh Prabhu-i Deobarnü tetuyuba agütsüogo.
RPF nung inyaker asem den nisung ka densema ajok amer matamabensar ka dak taochi makai metsüa azükba video ka prokshiba sülen RPF Director General dang iba kuli tejangja bushitsü tetuyuba agütsüogo, ta pa twitter nung züluja liasü.
Iba matamabensar nisung ya mobile phone auyaba ken-o nung January 3 anepdang Guwahati nungi aruba train nungi anizük, saka iba tatalokba Deobar anogo nung ang meteta liasü.
Police ket nung ken-o agütsütsü asoshi iba matamabensar nisung ya bushiba mapang lir, aser RPF nung inyakertemi aibelena lira merenshitsü, ta Railway nung Superintendent of Police, Sanjay Kaushal-i metetdakja liasü.